A concellería de Medio Ambiente tivo coñecemento esta fin de semana da chegada de varios exemplares de “lebres de mar” á praia da Punta, en Cesantes. “Trátase dun molusco sen cunha que xa ten aparecido noutras praias das rías galegas, pero do que se tivo constancia por primeira vez en Redondela esta fin de semana”, explica a concelleira Pilar Martínez. É unha especie totalmente inofensiva, que habita nas rías galegas, pero non é habitual a súa chegada aos areais. “Os temporais, con mar de fondo, e o aumento da temperatura da auga poden ser algunhas das causas que as desorientan e fan que cheguen á costa”, sinala a edil. A súa presenza é un indicador do bo estado ambiental do medio mariño. Cando aparecen vivas entre as algas hai que procurar devolvelas ao mar, pero neste caso estaban todas mortas. Desde o Concello deuse aviso ao servizo de Costas da Xunta de Galicia, administración que ten a competencia para a retirada dos exemplares.