A iniciativa do BNG pretendía a volta dun segundo médico ao PAC de Caldas e a dotación de dous equipos profesionais completos
Esta mañá, o deputado Luís Bará denunciou na Comisión 5ª do Parlamento galego os recortes que a Xunta do PP leva practicado no PAC de Caldas nos últimos meses. O peor recorte posíbel no peor momento posíbel, xa que se produciu cando precisamente a pandemia da COVID rexistraba cifras récord de contaxios entre as veciñas e veciños dos concellos afectados.
Listas de agarda de máis de tres horas
A situación é de tal embergadura que as agardas de pacientes durante horas diante do PAC para ser atendidos polas tardes se converteron na estampa diaria habitual do Paseo Román López.
Os propios profesionais teñen denunciado a través dos medios de comunicación a tremenda
presión asistencial que teñen que atender en cada turno de traballo e as agardas de máis de tres horas ás que se ven obrigadas as pacientes en non poucas ocasións.
Sen embargo, lonxe de ofrecer respostas ou solucións, o director xeral de asistencia sanitaria, Jorge Aboal, limitouse a poñer escusas de mal pagador, negando os recortes na Sanidade Pública e atrevéndose incluso a bromear con un burlesco “estamos trabajando en ello e seguimos trabajando en ello”.
“O desprezo co que trata a Xunta do PP ás veciñas e veciños de Caldas é absolutamente
inaceptaábel” afirmou Manuel Fariña. “Que todo un director xeral da Xunta de Galiza teña o
atrevemento non só de negar a realidade que se vive cada día no Centro de Saúde de Caldas, e aínda por enriba se permita o luxo de facer bromas sobre o tema deixa ben claro que para o Partido Popular a saúde das veciñas e veciños de Caldas e da súa comarca non é importante” sentenciou o portavoz municipal.
Dende o BNG sempre defendemos o dereito das veciñas e veciños de Caldas a poder contar con unha Sanidade Pública de primeira, polo que defendemos non só a volta do segundo médico do PAC senón a dotación de dous equipos profesionais completos para atender este servizo de urxencias extrahospitalarias, que atende nada máis e nada menos que a 21.000 persoas dos concellos de Caldas, Cuntis, Moraña e Portas.
