Manuel Fariña: ”O alcalde e a Xunta terán que explicar por que lle negan a Formación Profesional ás mozas e mozos de Caldas”
“O alcalde e a Xunta terán que explicar por qué lle negan a Formación Profesional ás mozas e mozos de Caldas, por qué frustran as opcións de futuro da xente moza” sinalou Manuel Fariña.
A ampliación do IES Aquis Celenis asinada esta mañá polo Conselleiro de Educación e polo alcalde de Caldas non responde en absoluto ás demandas da comunidade educativa e da veciñanza caldense, pois non contempla en ningún caso a implantación dos Ciclos Formativos de FP que establezan novas opcións de futuro para as mozas e mozas da comarca.
Gañar espazo para albergar novos módulos de FP e aumentar a oferta formativa na educación pública non só é unha vella demanda da comunidade educativa do IES Aquis Celenis, senón que é unha prioridade para Caldas e para o BNG; sen embargo parece que o PP e o PSOE decidiron deixar de lado as demandas reais das veciñas e veciños e apostar por unha ampliación insuficiente e descafeinada.
Por outra banda, chama a atención o descoñecemento total e absoluto da realidade que manifesta a Consellería de Educación, pois na actualidade o IES Aquis Celenis conta con máis grupos dos que indica a consellería no seu comunicado, xa que na actualidade non conta con 3 aulas de bacharelato en cada curso, senón que hai 9 grupos de bacharelato, 5 en primeiro e 4 en segundo.
“Caldas precisa ampliar a súa oferta educativa para mellorar as oportunidades de futuro, especialmente da xente máis moza. Non se entende como se pode abandonar deste xeito a implantación da Formación Profesional no noso IES” afirmou Fariña.
