O espectáculo musical representarase o sábado 14 de maio ás 20:30 horas no Centro Sociocultural Sobrino Buhígas e contará coa participación do Grupo Cantalúa e a Banda de Gaitas Foula
A Coral Polifónica de Campo Lameiro conmemora o seu XXV Aniversario coa posta en escea do musical das Letras Galegas “Cousas de antes”, o vindeiro sábado 14 de maio ás 20:30 horas no Centro Sociocultural Sobrino Buhígas, nun espectáculo no que participarán tamén o Grupo Cantalúa e a Banda de Gaitas Foula e que conta coa colaboración do Concello de Campo Lameiro e a Deputación de Pontevedra.
O musical “Cousas de antes” forma parte da homenaxe e o agradecemento que a Coral Polifónica de Campo Lameiro ten coa musica tradicional galega da que esta masa coral se foi nutrindo ao longo dos 25 anos de existencia. “Se ben é certo que temos boa parte do noso repertorio en galego, esta será a primeira vez na que a Coral faga un verdadeiro achegamento á música folclórica galega”.
No espectáculo participará de xeito activo e decisivo a Banda de Gaitas Foula, “que ademais de acompañarnos, compartiron con nós os seus coñecementos dos ritmos tradicionais galegos durante este tempo de preparación. Ao bo facer dos músicos de Foula unirase a vitalidade e a ilusión dos compoñentes de Cantalúa, o noso coro infantil que participará en varias escenas teatrais e cancións coreografiadas”.
RECREACIONS DE MOMENTOS DO PASADO EN CLAVE DE HUMOR
Esta homenaxe á música e ao folclore galego a través do espectáculo “Cousas de antes” pretende ser “unha pequena recreación de momentos do noso pasado, en forma de pezas instrumentais, partes teatrais outras cantadas, todo elo con escenografía e vestiario e en clave de humor”.
As escenas teatrais están inspiradas en recordos da infancia “como aqueles dous homes que se atopan no camiño e se esquecen de ir erguerlle a cesta á muller; ou polas conversas das mulleres no río criticando os malos costumes dos homes e, como non, as escenas típicas de rifas entre mulleres e homes”. A cada escena séguelle unha canción a base de desafíos, regueifas, cantos de oficios, cantigas de traballo e todo elo a ritmo de pandeirada, muiñeira ou xota acompañados por instrumentos como o tamboril, bombo, pandeireta, axóuxeres, cencerros e gaitas.
A intención tamén deste espectáculo é crear un vencello interxeracional entre os maiores e os máis novos a través da lingua e do folclore propio de Galicia mediante un espectáculo “sinxelo, pero feito desde a ilusión, o agarimo e o respecto para rendirlle unha sentida homenaxe aos nosos 25 anos e á nosa música”.
