Xosé Sánchez Bugallo deu conta en rolda de prensa da proposta da Alcaldía de reparto do remanente de tesourería, logo de “escoitadas as propostas dos grupos da oposición” e tras a segunda reunión da Xunta de Voceiro, que tivo lugar este mañá.
Sánchez Bugallo lembrou que “formalmente hai 23 milllóns, dos cales 16 non están dispoñibles”, pois serán empregados “para afrontar gastos pendentes de pago, sentenzas, etc”. Polo tanto, segundo indicou o alcalde, “buscamos un acordo para 7,2 millóns aos que hai que sumar 1.604.000 euros dispoñibles da venda de parcelas o ano pasado”. En total, o remanente dispoñible alcanzaría a cantidade de 8.804.143 euros.
Unha parte importante, salientou o rexedor, destinaríase a axudas. En total serán 3.465.000 euros neste concepto, onde se encadrarían os bonos corazón, “que este ano contarán con 1.350.000 euros, máis do dobre que o ano pasado”. Avanzou o alcalde que unha convocatoria sairá á luz agora en xuño para a praza de Abastos e unha segunda, en setembro. Tamén se incluirán 400.000 euros para unha convocatoria de axudas para a renovación de comercio; outros 400.000 para o sector profesional da cultura; 300.000 para empresas de economía social; 300.000 para melloras da práctica de economía circular; ou 400.000 para un programa de axudas á contratación de persoas desempregadas maiores de 50 anos, menores de 30 e mulleres. Como novidade, sinalou Sánchez Bugallo, increméntanse en 15.000 euros as axudas ás asociacións comerciais, e en 50.000 as destinadas ás asociacións de veciños.
No tocante aos investimentos, que contarán cun total de 4.666.503 euros, destinaranse 566.503 euros a melloras na praza de Abastos; un millón para as rúas Mallou e Nogueira; 300.000 euros para o acondicionamento da Vía Verde; 350.000 para a terceira fase dos Basquiños; e 450.000 euros tanto para a mellora e reurbanización de Conxo como para o barrio de Sar, entre outras actuacións.
O listado complétase con varios estudos e proxectos, aos que se asignan 595.000 euros. Entre eles, 200.000 para o proxecto de reurbanización de San Caetano-Cruceiro da Coruña ou 60.000 para o do eixe Porta do Camiño-Alameda-Intermodal.
A proposta completa pode consultarse ao pé desta noticia. “A nosa intención”, indicou o rexedro, “é aprobala no pleno do día 31 de maio”.
