• Adolfo Campos solicita o voto para “manter Dozón á cabeza do ránking de concellos con máis investimentos por habitante na provincia de Pontevedra e entre os primeiros de Galicia”.
O presidente do PP de Pontevedra, Luis López, sinalou hoxe que os votos do domingo serán fundamentais para manter durante o próximo mandato a “velocidade de cruceiro” que colleu Dozón nestes anos, “un proceso de dinamización e transformación espectacular nun tempo récord, no que Adolfo Campos fixo en tres anos o que a moitos outros alcaldes lles leva doce”.
Por iso, “e porque aquí falan os feitos e tamén os proxectos de futuro”, pediu o domingo unha maioría contundente que avale a grande xestión do Goberno do Partido Popular. Foi durante o xantar no que participaron preto de 400 veciños, na que López sinalou que é importante non confiarse, “porque o noso peor inimigo é pensar que está todo feito, e isto combátese indo todos a votar, con ganas e con forza”. Cada voto será determinante, sinalou, para que Adolfo e o seu equipo “metan de cheo a Dozón no horizonte do ano 2030 con máis servizos, mellores instalacións e novos equipamentos”.
Pola súa banda, Adolfo Campos pediu o voto para “manter Dozón á cabeza do ránking de concellos con máis investimentos por habitante na provincia de Pontevedra e entre os primeiros de Galicia”. Entre os proxectos máis destacados para os vindeiros catro anos apuntou á construción da Residencia de maiores e a renovación do centro de saúde.
Entre as principais actuacións estes anos, destacaron a reforma do colexio; a renovación do servizo de recollida de lixo para convertelo nun dos máis eficientes da provincia; a aposta pola mellora do polígono e por atraer industrias cun viveiro de empresas; obradoiro de emprego; a restauración do Mosteiro de San Pedro; impulso no proceso de concentración parcelaria; a conexión coa Autovía cara Ourense; a urbanización do núcleo do Castro; a mellora dos servizos de atención municipal; o coidado continuo das pistas municipais e do alumeado; unha Casa do Maior e Casa Niño; o saneamento e abastecemento de augas…
