Esta intervención terá posteriormente continuidade cun segundo proxecto que afectará á vía entre San Pantaión e A Xesta.
O Concello iniciou hoxe o proceso de contratación da execución das obras previstas no proxecto de mellora da rede viaria na parroquia de Golmar, en concreto na estrada que comunica O Igrexario con San Pantaión.
O tramo obxecto desta intervención presenta unha lonxitude de 1.225 metros, nos que vai ser renovada a superficie de rodadura dos vehículos con aglomerado asfáltico en quente, acondicionados os sobreanchos a ambas marxes da calzada e perfiladas as cunetas para favorecer a drenaxe do terreo. Os traballos completaranse coa sinalización vertical e horizontal, contemplando o pintado das liñas dos bordes e do eixo da plataforma, así como dos símbolos necesarios segundo o código de circulación.
O orzamento alcanza os 106.000 euros, a cofinanciar entre o Concello e a Deputación da Coruña.
Esta actuación terá continuidade cun segundo proxecto que se executará posteriormente, cun presuposto doutros 96.000 euros e cofinanciado pola Xunta de Galicia a través da Axencia Galega de Desenvolvemento Rural (Agader) no marco do Plan de mellora de camiños municipais de acceso a parcelas agrícolas 2023-2024.
Neste caso a actuación proxectada afecta a 1.200 metros da vía desde San Pantaión en dirección á Xesta (parroquia de Soutullo), mellorando os accesos, por tanto, a outros núcleos como A Rocha, O Vilar e O Seixoso. Tamén se contempla a renovación da superficie de rodadura, a mellora da drenaxe e o reforzamento da seguridade viaria coa sinalización horizontal e vertical.
En total investiranse máis de 200.000 euros na mellora da estrada entre O Igrexario de Golmar e A Xesta, xa na parroquia de Soutullo.
