A Xunta de Goberno Local aprobou hoxe a saída a concurso do novo contrato, que complementa accións xa en marcha, como a reconfiguración das áreas de xogo na praza de Portugal e a gardaría do Ventorrillo
Ademais, o Executivo local deulle luz verde á licitación das tarefas de acondicionamento necesarias para mellorar a accesibilidade e as condicións de visita ao Castro de Elviña
O Concello destinará case 2,7 millóns de euros ao novo contrato de mantemento e conservación dos 223 parques infantís, áreas biosaudables, pistas multideporte e espazos lúdicos urbanos existentes na Coruña, un investimento previsto para o resto deste exercicio e tamén de cara aos dous próximos anos, ata o 2028.
A saída a concurso do contrato, aprobada esta mañá na Xunta de Goberno Local, reforza a liña de acción que está a impulsar o Goberno de Inés Rey para adaptar estas instalacións e equipamentos públicos ás demandas das persoas usuarias. Cómpre subliñar, ademais, que os pregos do contrato inclúen tamén as áreas infantís dos CEIP da cidade, polo que a prestación do servizo tamén atenderá as súas necesidades.
“O servizo de mantemento e conservación é fundamental para garantir o coidado dos espazos de xogo e os destinados á práctica deportiva e de exercicio físico ao aire libre”, explicou Inés Rey, que fixo fincapé na importancia de que, ademais de dotar os barrios de máis e mellores equipamentos, tamén haxa unha atención e seguimento constante das melloras que se van acometer en cada recinto.
Neste sentido, a rexedora lembrou que o Concello prevé executar este ano a reconfiguración dos parques infantís da praza de Portugal e a gardaría do Ventorrillo —este último, cuberto—, o que permitirá adaptar as dúas áreas de xogo ás necesidades existentes, con equipamentos máis modernos, adaptados e accesibles para todas as crianzas.
Ademais, en paralelo, o Concello tamén está ultimando a creación dunha nova pista multideporte na Urbanización Breogán, que se sumará ás xa habilitadas meses atrás no barrio dos Rosales e no núcleo poboacional da Silva.
Todas estas instalacións de xogo, tanto as xa abertas como as que se habiliten a posteriori, estarán incluídas neste contrato de mantemento e conservación que sae agora a licitación, que recolle unha duración inicial de dous anos e tamén unha posibilidade de prórroga por outros tres.
Actuacións de mellora no Aquarium Finisterrae e no Castro de Elviña
Noutra orde de asuntos, a Xunta de Goberno Local tamén lle deu luz verde hoxe a novos investimentos no Aquarium Finisterrae e no xacemento arqueolóxico do Castro de Elviña.
No caso do acuario, o Concello efectuará unha intervención de impermeabilización na base do muro de peche do Paraíso Mariño, unha das piscinas exteriores do museo. A previsión é que se destinen uns 108.000 euros á intervención, que contará cun prazo de execución de catro meses desde a adxudicación dos traballos.
As actuacións sobre o patrimonio cultural municipal non rematarán aí, senón que tamén se estenderán ao Castro de Elviña, onde o Executivo local prevé iniciar nos vindeiros meses as tarefas de acondicionamento necesarias para mellorar a accesibilidade e as condicións de visita a un dos principais emblemas da rede de Museos Históricos da Coruña.
Con esta iniciativa, o Goberno de Inés Rey reforza o seu plan de traballo para pór en valor do Castro de Elviña e a súa contorna, para o que este mesmo ano se aprobaron outras dúas actuacións de mellora: por un lado, a execución do centro de apoio ás actividades arqueolóxicas e didácticas; e, por outro, a creación do novo valado perimetral que rodea o xacemento, clave para reforzar a súa protección e coidado.
