Á tradicional ofrenda floral diante do busto do cura de Fruíme uniranse este ano as actuacións de todas as agrupacións musicais do municipio, unha Andaina das Letras e un xantar organizado pola AAVV Zernadas de Castro de Fruíme
“O domingo 17 de maio en Fruíme queremos conseguir sacar unha fotografía que sexa o resumo do apoio unánime que a veciñanza de Lousame, o seu tecido asociativo e distintas persoas do mundo cultural, político e social de toda Galicia lle ofrecen á candidatura Zernadas 27 e que lle piden á Real Academia Galega que lle dea o recoñecemento que merece ao persoeiro máis ilustre que temos en Lousame: Diego Antonio Zernadas de Castro”. Así resumía o alcalde de Lousame, Esteban Ares, o obxectivo da programación especial da “Festa do Galego 2027: todos con Zernadas”, presentada esa mañá no salón de plenos.
Unha presentación na que estivo acompañado por María Regenjo, secretaria da Asociación de Veciños Zernadas de Castro; Silvia Agrafojo, concelleira de Cultura; Isabel Gómez Morales, presidenta da Asociación Cultural Prudencio Romo; Francisco Avelino García e Isabel González, presidente e vicepresidenta do Club de Xubilados de Lousame; así como Teresa Baluja e Xosé Manuel Outeiral, técnicos municipais de Cultura e Voluntariado.
Apoio veciñal
Esteban Ares asegurou que esta Festa do Galego “é fundamental para que lles chegue aos ollos dos académicos o movemento veciñal e o apoio unánime que hai en torno a esta candidatura que, como sempre dicimos, é de xustiza histórica. Recoñecer o labor de Zernadas non é mirar ao pasado, é recoñecer que é o precursor do galeguismo que defendía a nosa lingua no século XVIII. Zernadas pensaba en Galicia cando Galicia aínda estaba por pensar, polo que merece un recoñecemento e cremos que é o momento de que Galicia mire cara Lousame e a RAG poña os seus ollos en Fruíme para recoñecer o labor do precursor do galeguismo. E que mellor recoñecemento que dedicarlle o Día das Letras Galegas, que toda Galicia coñeza todo o seu labor e que Zernadas sexa coñecido a nivel de toda a poboación de Galicia e se estude nos centros educativos como referente”.
Un punto no que coincidiu a concelleira de Cultura, Silvia Agrafojo, quen destacou esta celebración do domingo 17 de maio como “o colofón a todas as actividades sobre Zernadas de Castro. Queremos contar aló con todas as asociacións do concello, tanto deportivas como culturais, sociais, persoas… estaremos agradecidos de recibir a todo o mundo porque o que queremos é que se vexa o fervor que temos en Lousame por que por fin se lle dedique o Día das Letras Galegas a Zernadas de Castro”. Neste sentido agradeceu “á AAVV Zernadas de Castro de Fruíme todo o labor que levan a cabo, dende o Concello apoiámolos en todo para facer chegar a figura de Zernadas o máis lonxe posible, non só a Lousame senón pola comarca. E esperamos encher o adro da igrexa con pancartas de todas as asociacións e desfrutar do 17 de maio”.
Programación
O programa de actividades da “Festa do Galego 2027: todos con Zernadas” desenvolverase na contorna da igrexa de Fruíme, onde está soterrado Zernadas de Castro. Ás 10:00 horas terá lugar a segunda edición da “Andaina das Letras”, organizada polo Concello de Lousame e a asociación de veciños Zernadas de Castro de Fruíme. Trátase dunha iniciativa familiar, aberta a persoas de todo tipo de condición física xa que apenas son 5 km, con saída e meta no Adro da Igrexa de Fruíme. Cada 500 metros, as persoas participantes poderán ver unha lámina sobre a vida e obra de Diego Antonio Zernadas de Castro. A participación é totalmente gratuíta, se ben é necesario anotarse previamente en www.bandoticket.com. Na súa primeira edición, celebrada unha semana antes da Festa do Galego, conseguira reunir a medio cento de persoas.
Ás 11:15 horas terá lugar a actuación musical do grupo folclórico O Son do Pote (Tállara), que abrirá así un tempo no que participarán todas as agrupacións musicais do municipio. Así, a Banda de Música de Lousame actuará ás 12:30 horas, tras a tradicional ofrenda floral diante do busto de Zernadas de Castro (con misa na súa honra ás 12:00 horas).
Ás 13:30 horas, actuacións musicais do grupo folclórico Canlebó (Camboño), das Pandeireteiras da UNED Senior Lousame e do grupo Anduriñas de Fruíme. Estes tres grupos darán paso a unha sesión vermú amenizada polo Dúo Charada e, a partir das 15:00 horas, a un xantar popular organizado pola Asociación de Veciños Zernadas de Castro de Fruíme.
A secretaria da asociación, María Regenjo, explicou que “os prezos serán: 20 euros adultos e 12 euros nenos, con primeiro e segundo pratos, sobremesa e bebida. O ano pasado foi un éxito e este ano decidimos repetir e ampliar o número de prazas”. As inscricións poden realizarse antes do 12 de maio a través das Redes Sociais da asociación que, ademais, vén de sacar unha edición especial dunha camiseta conmemorativa co logotipo da campaña Zernadas 27, que se poderá adquirir en Fruíme o propio día da festa.
