O presidente da Deputación inaugurou as XV Xornadas de Enfermaría de Ourense destacando o liderado desta profesión no futuro do sistema sanitario
O presidente da Deputación de Ourense, Luis Menor, participou esta mañá no acto inaugural das XV Xornadas de Enfermaría da Área Sanitaria de Ourense, Verín e O Barco de Valdeorras, celebradas no Auditorio Municipal da cidade, onde puxo en valor o papel “esencial e insubstituíble” desta profesión na atención sanitaria e na cohesión territorial da provincia.
No seu discurso, Menor destacou que a Enfermaría representa “o compromiso co coidado das persoas no seu estado máis puro”, subliñando a súa capacidade para “acompañar, escoitar e soster aos pacientes nos momentos máis complexos”. Neste sentido, incidiu en que o labor das e dos profesionais de enfermaría vai moito máis alá da asistencia sanitaria, converténdose nun piar fundamental do sistema público de saúde.
O presidente provincial quixo tamén facer un recoñecemento en clave histórica, lembrando que hai dous anos Ourense conmemorou o 50 aniversario da Escola de Enfermaría, “un proxecto impulsado pola Deputación que marcou un antes e un despois na formación sanitaria da provincia”. Menor salientou o papel das primeiras promocións, “mulleres pioneiras que abriron camiño con esforzo, disciplina e vocación de servizo”, e que sentaron as bases dunha profesión hoxe plenamente consolidada e en constante evolución.
Desde esa perspectiva, destacou a continuidade do compromiso da institución provincial coa Enfermaría, “desde o seu nacemento ata o seu presente e futuro”, poñendo en valor a evolución cara a un modelo profesional que integra coñecemento, investigación, innovación e capacidade de liderado.
En clave provincial, Luis Menor incidiu na importancia da Enfermaría nun territorio como Ourense, caracterizado pola dispersión poboacional e o envellecemento, sinalando que estes profesionais “garanten que a atención sanitaria chegue a cada recuncho, convertendo a proximidade en calidade asistencial e en igualdade de oportunidades para toda a cidadanía”.
As xornadas, que se desenvolven baixo o lema “Da vocación ao liderado: a enfermaría que vén”, reúnen a profesionais do ámbito sanitario, científico e académico co obxectivo de compartir coñecementos, experiencias e boas prácticas, promovendo a innovación, a formación continua e a humanización dos coidados.
O programa inclúe tamén a participación activa de asociacións de pacientes, un aspecto que o presidente da Deputación valorou de maneira especial ao considerar que “incorporar a súa voz supón avanzar cara a unha sanidade máis participativa, máis próxima e máis humana”.
Luis Menor concluíu a súa intervención subliñando que “unha sociedade mídese pola forma na que coida das súas persoas”, asegurando que “Ourense pode sentirse orgullosa de contar cunha enfermaría comprometida, preparada e chamada a liderar os retos do futuro sanitario”.
