Os esoclares de Pazos de Borbén aprenden sobre o patrimonio histórico do municipio

- Anuncio -

Máis de 30 alumnos de CPI Curros Enríquez participaron nun roteiro pola senda arqueolóxica de Amoedo
Máis de 30 alumnos de primaria de Pazos de Borbén participaron esta mañá nun roteiro guiado por un dos maiores xacementos arqueolóxicos do municipio, a senda arqueolóxica de Amoedo. A iniciativa, impulsada pola biblioteca municipal, ten como obxectivo achegar aos máis pequenos á historia do municipio e o seu patrimonio arqueolóxico.
Durante o roteiro, de ao redor de 2km de lonxitude, os pequenos coñeceron restos de diferentes épocas históricas, desde o neolítico ata a idade media. Entre eles destaca o foso de lobos de dobre converxencia, unha estrutura única en Galicia que foi catalogada recentemente, aumentando o valor histórico do roteiro. Ademais, os pequenos puideron admirar nove petróglifos da Idade de Bronce e seis mámoas.
Para repoñer forzas, despois do roteiro os pequenos gozaron dun xantar por cortesía da comunidade de montes de Amoedo, que entregou a cada mozo unha foto de recordo.
A edil da biblioteca, Dores Santoro, destacou o beneficio desta clase de iniciativas para complementar a educación dos pequenos. “Unha cousa é estudar a historia e outra é poder vela e tocala. Ademais, é a mellor maneira de ensinar aos máis novos a valoralo e respectalo”, finalizou a edil.