Os asistentes portarán cirios para dar visibilidade as súas protestas mentras o Concello prepara xa o expediente para declarar “Persoa non grata” a Juan Carlos Escotet
A Corporación Municipal de Campo Lameiro ofrecerá un velorio na noite do 8 de setembro para expresar a repulsa dos veciños e veciñas do municipio ante o peche da sucursal de Abanca, prevista para ese mesmo día.
O acto ten previsto comezar ás 21:30 horas e os concentrados acompañarán a un cadaleito especialmente confeccionado para escenificar a morte do mundo rural galego coa desaparición paulatina de servizos esenciais para fixar poboación como son as oficinas bancarias.
O cortexo fúnebre, acompañado por veciños e veciñas de Campo Lameiro portando unha vela ou un cirio (que aportará o Concello aos participantes), ten previsto arrancar sobre as 21:30 horas da noite desde a Praza do Concello para dirixirse ata a sucursal de Abanca onde terá lugar o sepelio e a liturxia da palabra.
Os concentrados escoitarán un emotivo responso especialmente elaborado para poñer de manifesto os prexuízos e os problemas que suporán para os veciños e veciñas de Campo Lameiro e dos demais concellos afectados polo peche de oficinas bancarias a perda deste tipo de servizos.
INICIO DO EXPENDIENTE PARA DECLARAR “PERSOA NON GRATA” AO PRESIDENTE DE ABANCA, JUAN CARLOS ESCOTET
Por outra banda, o alcalde, Carlos Costa, deu orde aos funcionarios municipais para que recaben toda a información necesaria para ter preparado administrativamente o expediente para declarar “Persoa non grata” ao presidente de Abanca, Juan Carlos Escotet, no caso de que se efectúe o peche previsto da sucursal de Campo Lameiro para o vindeiro 8 de setembro.
A intención dos tres grupos que conforman a Corporación Municipal (PPdeG, Porvir e PSdeG-PSOE) é levar ao vindeiro pleno municipal ese punto na orde do día para ser aprobado por unanimidade “como xeito de dignidade dun pobo que expresa de xeito institucional a súa rebeldía fronte a un atropelo ante o cal non se pode resignar”, segundo manifestaron os voceiros dos tres grupos políticos.
De concretarse o peche da sucursal de Abanca en Campo Lameiro, única existente no municipio, a Corporación Municipal está decidida a facer efectivo o nomeamento de Juan Carlos Escotet como “Persoa non grata” a primeira que este dirixente da banca española recibiría en todo o Estado Español.
