Os asistentes aprenderán a crear un correo electrónico, sacar unha vida laboral, solicitar permisos de queima, pedir os recibos do ORAL, cita no médico, selar o paro, presentar de forma electrónica documentación diante de calquera organismo, etc.
O Concello da Lama acaba de poñer en marcha un obradoiro de iniciación ao manexo de ordenador e internet no que participan unha decena de persoas interesadas en recibir alfabetización informática e que, por distintas razóns, mantíñanse fóra do circuito das novas tecnoloxías.
Os asistentes a este obradoiro aprenderán a crear un correo electrónico, sacar unha vida laboral, solicitar permisos de queima, pedir os recibos do ORAL, cita no médico, selar o paro, presentar de forma electrónica documentación diante de calquera organismo público, etc.
O curso desenvólvese nos locais do antigo edificio do Obradoiro de Emprego para manter o distanciamento social e as medidas sanitarias de prevención do Covid-19, acuden en dúas quendas para maior comodidade de tal xeito que todos e cada un dos participantes teñen un ordenador á súa disposición.
O curso, que está subvencionado pola Deputación de Pontevedra e o Concello da Lama, está estruturado en 4 bloques nos que se abordará a introducción á informática Hardware e Software; sistema operativo Windows; ferramentas ofimáticas; e internet, e-mail, redes sociais, plataformas dixitais, etc.
O tenente de alcalde, David Carrera, realizou unha visita ao obradoiro e felicitou aos participantes nesta iniciativa formativa, sobre todo a aquelas persoas maiores que se esforzaban por coñecer e aprender a utiliza-las ferramentas que pon á disposición da cidadanía a informática e sobre todo internet. Manifestoulles que a intención do Concello é seguir pondo a disposición dos veciños e veciñas todos aqueles elementos que contribúan a súa formación e a mellora-la súa calidade de vida e evitar calquera fenda tecnolóxica da que poidan ser vítimas tendo en conta que o futuro e o camiño vai da man dos ordenadores, os teléfonos intelixentes, as tablets e toda unha serie de dispositivos móbiles.
