A convocatoria tivo unha excepcional acollida e hai máis de cen persoas en lista de agarda para participar no curso, que se prolongará ata o 9 de decembro
A profesora e referente feminista Rosa Cobo, que dirixe o seminario, impartirá mañá xoves ás 18.30 horas a primeira sesión, que abordará as orixes do feminismo e a cuarta onda feminista
O curso on line sobre “Debates Teóricos e Axenda Política Feminista” organizado pola Escola de Igualdade María Vinyals da Deputación de Pontevedra arranca mañá xoves logo de ter unha excepcional acollida. Deste xeito, son 150 as persoas que iniciarán este seminario, que dirixe a escritora e profesora da Universidade de A Coruña Rosa Cobo, e a lista de agarda para participar supera tamén as cen persoas. A actividade desenvolverase ata o 9 de decembro en sesións telemáticas que impartirán mulleres referentes a nivel nacional e internacional, a maioría delas docentes universitarias.
Serán un total de 8 sesións a través da plataforma Zoom nas tardes dos xoves, de 18.30 a 20.30 horas (excepto o xoves 25 de novembro, que pasará a celebrarse o venres 26), e a institución provincial emitirá diploma acreditativo ás persoas que realicen as 16 horas. Rosa Cobo, a directora do curso, será a encargada de impartir mañá a súa primeira sesión, baixo o título “Feminismo: tradición intelectual e movemento social. Orixes do feminismo e desenvolvemento histórico. A cuarta onda feminista e o seu corpo vindicativo”, mentres que o día 28 deste mes de outubro será Carmen Ruíz Repullo, da Universidade Pablo Olavide Sevilla, quen falará de “Debates feministas en torno á violencia sexual”.
En novembro, o día 4 as profesoras Beatriz Ranea, da Universidade Complutense de Madrid, e Lydia Delicado, da Universidade de Alicante, falarán sobre “O imaxinario pornográfico e o dominio masculino” e o día 11 o seminario continuará coa charla “A prostitución na intersección de tres sistemas de poder: patriarcado, raza e clase. Debates abolicionistas”, a cargo de Rosa Cobo. Amais, o 18 novembro será a quenda de Laura Nuño, da Universidade Rey Juan Carlos e de María Luisa Balaguer, da Universidade de Málaga e maxistrada Tribunal Constitucional, que abordarán os “Ventres de aluguer: explotación reprodutiva e feminización da pobreza”. E o 26 novembro terá lugar a sesión “Críticas feministas á democracia. Mulleres e poder político. Democracia paritaria”, a cargo de Mar Esquembre, da Universidade de Alacante.
Xa en decembro, o día 2 Carmen Castro, economista feminista e asesora en Políticas de Igualdade falará sobre “A crítica feminista ao capitalismo neoliberal. A política sexual do novo capitalismo. O curso rematará o 9 decembro coa charla “Orixes e supostos do pensamento queer: o debate sobre o suxeito político do feminismo” que ofrecerá Luisa Posada Kubissa, da Universidade Complutense de Madrid.
