Con este novo recoñecemento a peza alza xa o seu oitavo premio en festivais de todo o mundo e volve a situar á provincia no mapa internacional
O audiovisual “Sigue o teu instinto”, coa que a Deputación promocionou a campaña turística en 2020, segue a colleitar éxito nos festivais internacionais de todo o mundo. A peza vén de alzar xa o seu oitavo galardón ao acadar o segundo premio na categoría de Produto Turístico na 16º edición do FilmAT Festival de Varsovia (Polonia) tras captar a atención do xurado ao promocionar a provincia como un destino sostible e responsable.
Da man de Celia Freijeiro, a protagonista da produción de Esmerarte, “Sigue o teu instinto” anima regresar ás orixes e desfrutar do patrimonio natural de Pontevedra provincia. No vídeo amósase como o territorio forxa o carácter da veciñanza da nosa provincia, á que sempre é necesario volver para volver a atoparse con un ou unha mesma a través das súas paisaxes, habitantes e cultura.
Este novo recoñecemento súmase á cada vez máis extensa lista de galardóns que está a acadar a peza. Deste xeito, o premio obtido en Polonia súmase ao do “The Golden City Gate” de Berlín, como un dos mellores audiovisuais de ecoturismo do mundo; o Ouro no Festival ITTF África (Cape Town); o mellor vídeo de promoción de produto turístico no Fitur Travel Video Competition de Madrid e o Ouro no Tourism Film Festival de Turquía, na categoría de produto turístico. “Sigue o teu instinto” tamén se fixo co primeiro premio en Produto Turístico na categoría Blue Danube no Silafest de Serbia, o Premio “Ouro en Produtos Turísticos / Destino Rural” no Terres Festival de Tortosa e o terceiro premio na categoría de Produto Turístico no Festival de Turismo de Riga.
