· O delegado do Goberno, José Miñones, presidiu o acto de comezo duns traballos que permitirán mellorar a seguridade e reducir accidentes nun punto negro de tráfico.
· O Ministerio de Transportes, Movilidad e Axenda Urbana (Mitma) destina 1,3 millóns de euros a esta actuación, que inclúe tamén outra rotonda na intersección coa AC-214.
· “Son unhas obras necesarias e moi demandadas, nun punto no que estamos cansados de ver accidentes”, destacou a alcaldesa.
O delegado do Goberno en Galicia, José Miñones, a alcaldesa de Bergondo, Alejandra Pérez Máquez, e a subdelegada do Goberno, María Rivas, presidiron hoxe, luns 19 de setembro, o acto de inicio das obras de construción de dúas glorietas na confluencia da estrada N-6, coa AC-164 (km 580,000) e a AC-214 (km 579,400), en Guísamo.
Na súa intervención, Alejandra Pérez Máquez cualificou este día como “feliz, xa que son unhas obras necesarias e moi demandadas, nun punto no que estamos cansados de ver accidentes e que ademais resolverán a intersección coa AC-214 xa que agora as incorporacións desde esta vía son complicadas”. “Estarei máis contenta aínda cando volvamos estar aquí para dar por finalizadas as obras”, expresou.
Pola súa banda, o delegado celebrou que “hoxe damos resposta a unha demanda veciñal histórica cunha obra que é exemplo da nosa aposta pola modernización das vías e a mellora da seguridade viaria do conxunto da poboación”.
Características técnicas
O Ministerio de Transportes, Movilidad e Axenda Urbana (Mitma) destina 1,3 millóns de euros a esta mellora da seguridade viaria, coa que actúa sobre un Tramo de Concentración de Accidentes (TCA) detectado.
A obra inclúe a remodelación da intersección existente no km 580,000 da estrada N-6 coa AC-164, transformándoa nunha glorieta dotada de vías de servizo laterais que permitan o acceso ás propiedades lindeiras. Ata 25.000 vehículos circulan diariamente por este cruzamento.
O proxecto tamén prevé a implantación dunha nova glorieta reducida na intersección do km 579,400 da N-6 coa AC-214. Ademais, reordenaranse os accesos entre ambas as glorietas.