O acto desenrolarase este domingo ás 12 horas na Casa de Cultura no lugar de Porta do Conde, lugar de nacemento do insigne ilustrado.
A Asociación Cultural e Deportiva Domingo Fontán e o Concello de Portas homenaxearán este domingo 28 de abril, a partir das 12 do mediodía, á figura do matemático, cartógrafo e ilustrado nado hai 236 anos en Porta do Conde cunha serie de actos entre os que destacan un pregón a cargo de José Manuel Fariña, profesor de Historia da Arte na IES Aquis Celenis, e unha ofrenda floral diante do monumento do insigne ilustrado.
O evento dará comezo ás 12 do mediodía na Casa de Cultura no lugar de Porta do Conde, lugar de nacemento do xeógrafo, onde o profesor de Historia da Arte do IES Aquis Celenis, José Manuel Fariña, lerá o pregón que terá como fío central a vida e a obra do insigne matemático e ilustrado Domingo Fontán.
Unha vez rematada a intervención de José Manuel Fariña, representantes da Asociación Cultural e Deportiva Domingo Fontán e o alcalde de Portas, Ricardo Martínez, así como membros da Corporación Municipal, depositarán unha ofrenda floral diante do monumento ao insigne cartógrafo e xeógrafo por mor do 236 aniversario do seu nacemento.
Despois das intervencións protocolarias en lembranza do ilustrado galego, interpretarase o himno galego por parte do Grupo de Gaitas Domingo Fontán de Portas que dará por rematado o acto de homenaxe a este insigne fillo do concello de Portas.
