As entradas para os cinco pases no Teatro Colón xa están á venda
Galicia Magic Fest chega á súa oitava edición cun gran elenco de ilusionistas de relevancia mundial e caras coñecidas de programas como Got Talent. Os días 2 e 3 de xaneiro haberá catro sesións no Teatro Colón, ás 18.00 e 20.30 horas o xoves 2 e ás 12.00, 18.00 e 20.30 horas o venres 3. Este espectáculo forma parte da programación de Nadal do Concello, coa que “o Goberno de Inés Rey ofrece un mes completo de actividades para todos os públicos e idades”, tal e como sinalou o concelleiro de Cultura e Turismo, Gonzalo Castro.
Será unha gala internacional trepidante na que se poderán ver especialidades moi diferentes da man dalgúns dos ilusionistas máis prestixiosos do mundo. Galicia Magic Fest está organizado polo reputado ilusionista galego Pedro Volta, que participará no espectáculo xunto con Hakan Berg (Suecia), Trigg Watson (Estados Unidos), Lea Kyle (Francia), Anca e Luca (Austria e Hungría) e Hun Lee (Corea do Sur).
As entradas para todas as sesións atópanse á venda a través de Ataquilla e no despacho de billetes da praza de Ourense. Tamén será posible adquirilas o mesmo día do espectáculo, sempre que haxa dispoñibilidade. A Coruña volve ser unha das cidades onde se celebra este festival de maxia e na que máis sesións se celebran, xa que nas anteriores ocasións houbo unha gran resposta do público.
O renovado elenco de ilusionistas e magos conta con numerosos premios de prestixio mundial e participacións nos concursos máis importantes de talento como Got Talent, nas edicións norteamericana e sueca. Trátase dun espectáculo familiar moi consolidado en Galicia e o número de sesións que levan a cabo convérteo nun dos máis importantes de España de ilusionismo.
