A documentación poderá consultarse na oficina técnica de Urbanismo de Frades, onde a veciñanza poderá presentar as alegacións que estimen oportunas
O equipo de Goberno do Concello de Frades maniféstase en contra do proxecto do parque eólico Gasalla, que pretende instalar 7 aeroxeneradores de 3,465 MW de potencia unitaria (24,255 MW de potencia total) nos concellos de Frades e Mesía. O alcalde de Frades, Roberto Rey Martínez, anuncia que “presentaremos as alegacións oportunas para evitar as consecuencias irreparables que este proxecto traerá consigo”.
O equipo de Goberno do Concello de Frades tomou esta decisión diante da publicación hoxe no DOG do acordo do 6 de setembro de 2022, da Xefatura Territorial da Coruña, polo que se someten a información pública a solicitude de autorización administrativa previa, a autorización administrativa de construción, o estudo de impacto ambiental (EIA) e o proxecto de interese autonómico (PIA) do proxecto do parque eólico Gasalla, nos concellos de Frades e Mesía (expediente IN408A 2017/26).
O prazo para emitir alegacións/achegas/opinións será do 19 de setembro ao 31 de outubro de 2022. A documentación poderá consultarse na oficina técnica de Urbanismo do Concello de Frades os luns, mércores e venres, en horario de 10:00 a 14:00 horas. Os veciños e veciñas poderán presentar as alegacións ou observacións que estimen oportunas na propia oficina de Urbanismo de Frades.
Proxecto
O proxecto do parque eólico Gasalla está promovido pola empresa Green Capital Power SL e se atopa nestes momentos en fase de envío de suxestións. Afecta aos concellos de Mesía e Frades, onde pretende instalar 7 aeroxeneradores que suman unha potencia total de 24,255 MW, cunha produción media estimada de 69.026,56 MW/ano. Conta cun orzamento de execución material de 21.077.457,46 euros e un prazo de execución de doce meses.
Esta non é a primeira ocasión na que o Concello de Frades presenta alegacións contra un proxecto de parque eólico. En abril deste mesmo ano, o equipo de Goberno fradense presentou alegacións ao parque eólico Brancellao por non ser compatible nin co planeamento nin co medio socioeconómico e produtivo do municipio. Un proxecto de maior envergadura que finalmente foi informado desfavorablemente pola Xunta de Galicia.
