Os días anteriores xogarase tamén no campo municipal unha nova edición do torneo promovido polo veterano club local
O Campo municipal Juanito González converterase o vindeiro domingo en escenario do II Triangular feminino Concello de Neda. A competición, impulsada co apoio da SD Rápido de Neda, completará unha fin de semana repleta de fútbol na vila, que arrincará co tradicional torneo que cada mes de setembro organiza o veterano club local.
O Concello, que apoia anualmente o traballo a prol do fútbol base que fai o Rápido de Neda, patrocina desta volta, no marco da súa aposta polo deporte en igualdade, o torneo feminino. Un deporte que non deixa de medrar e que está a vivir un bo momento a nivel local.
A competición prolongarase durante toda a xornada do domingo, disputándose nas categorías cadete e sénior. En horario matinal, disputarase a primeira das categorías citadas. Ás 11:00 horas, xogarase o partido entre a SD. O Val e o CD As Pontes. De seguido, as deportistas do Rápido de Neda mediranse primeiro co equipo perdedor do primeiro encontro (12:00 h) e, a continuación, co cadro vencedor (13:00 h).
Pola tarde, repetirase o esquema, sendo a quenda das xogadoras sénior. Ás 16:00 horas, terá lugar o encontro que enfrontará ao Silva SD. e a Discalzas SD. As perdedoras xogarán a partir das 17 horas coas locais do Rápido de Neda, que despois tratarán de golear ás vencedoras dos partidos.
Torneo tradicional
O triangular feminino poñerá o broche de ouro a tres días de festa deportiva en Neda. Así, o venres 18 pola tarde, e o sábado 19 de setembro, dende as 9:30 ata as 21 horas, celebrarase no campo municipal a XV edición do torneo da SD Rápido de Neda. Unha cita xa clásica que reunirá na vila a 24 equipos da comarca, repartidos entre as categorías prebenxamin, benxamín (fútbol 8), e alevín (fútbol 7). En total, preto de 300 deportistas.
