Estanse a ampliar as beirarrúas e crearase un novo paso de peóns no cruzamento coa rúa Nebrija
O Concello da Coruña, a través da súa Concellaría de Urbanismo, Vivenda, Infraestruturas e Mobilidade, está a levar a cabo traballos de mellora na rúa Jorge Borrow. O obxectivo é mellorar a accesibilidade da rúa mediante a súa reurbanización completa.
A actuación consistirá na ampliación das beirarrúas en ambas as marxes e a creación dun novo paso de peóns no cruzamento coa rúa Nebrija. Ademais, os dous pasos de peóns de Jorge Borrow quedarán elevados, o que suporá unha importante mellora en materia de accesibilidade na contorna.
Aproveitando os traballos de reforma da rúa levarase a cabo a renovación da rede de saneamento e instalarase a rede de canalización municipal en ambas as beirarrúas. O novo pavimento será de terrazo e na calzada serán lousas de formigón pintadas de negro nas zonas de paso de peóns. Manterase a praza de aparcadoiro para persoas con mobilidade reducida, que ficará localizada na marxe esquerda.
“Con esta actuación o Goberno de Inés Rey continúa a mellorar a mobilidade nos distintos barrios a través de actuación que supoñen un claro avance en termos de accesibilidade”, sinala Francisco Díaz Gallego, concelleiro de Urbanismo, Vivenda, Infraestruturas e Mobilidade. O Concello inviste nesta actuación 98.000 euros e está previsto que os traballos rematen no mes de abril.
O Goberno municipal tamén finalizou recentemente o carril bici que conecta a avenida de Fisterra entre o paseo das Pontes e Jorge Borrow. Esta estrutura, en sentido saída cidade, supón a ampliación da rede ciclable na cidade, que xa supera os 50 quilómetros en total.
Ademais, tamén se levaron a cabo traballos de renovación do pavimento na contorna, concretamente na avenida de Fisterra.
