A Agrupación Socialista de Oroso lamenta o uso partidista do cribado de detección da Covid-19 que se está a levar a cabo no centro de saúde de Sigüeiro por parte do Partido Popular. Unha utilización que na tarde de onte martes incluíu a visita ao centro por parte do secretario xeral do Partido Popular da Coruña, Gonzalo Trenor, e o voceiro municipal do PP de Oroso, Alexánder Doval.
Os Socialistas de Oroso remarcan que onte a Sigüeiro non veu o delegado Territorial da Xunta, senón o secretario xeral do Partido Popular coruñés. Veu facer política partidista, pero utilizando os medios de propaganda da Xunta de Galicia. Neste sentido, lembran que dende a Delegación Provincial da Xunta non comunicaron en ningún momento a súa visita oficial ao municipio, como si fixeran o pasado mes de xaneiro cando o propio Gonzalo Trenor estivo ata ten dúas ocasións no municipio. De feito, a visita de onte nin sequera estaba incluída nas previsións informativas, nin nas sucesivas ampliacións, que a Xunta de Galicia envía cada día aos medios de comunicación.
Os Socialistas de Oroso lamentan que nuns tempos nos que dende a Xunta nos piden a todos os galegos e galegas que esteamos na casa e evitemos os desprazamentos que non sexan imprescindibles, os señores do Partido Popular decidan pasar das restricións e vir a Oroso a sacarse unha foto vergoñenta. Unha situación que xa é habitual no caso do señor Doval, pero que nos sorprende de parte de alguén que debería saber distinguir entre os seus cargos na Xunta e no seu partido.