Case 2.000 persoas foron atendidas durante este verán na Oficina de turismo de Neda. O servizo municipal, habilitado polo Concello durante a tempada alta, busca mellorar a información en destino e optimizar a atención que se presta aos visitantes, especialmente aos peregrinos e peregrinas que percorren o Camiño Inglés.
Do 15 de xuño ao 15 de setembro, de forma presencial ou telefónica (esta última residual), o persoal da oficina atendeu a un total de 1.977 persoas. Unha cifra semellante á rexistrada no verán anterior, aínda que, a diferencia daquel, destaca especialmente a afluencia de público do mes de agosto, no que pasaron por este punto de recepción de visitantes case 900 persoas.
Dada a localización da nova caseta, en plena ruta xacobea e á beira do albergue de peregrinos, máis do 90% son romeiros que se dirixen a Compostela. E o 65 % dos usuarios e usuarias do servizo son persoas que elixen o albergue de Neda, pertencente á rede pública, para facer noite.
Neste contexto, loxicamente as demandas de información máis habituais son as relativas ao Camiño Inglés. Con todo, cada vez máis peregrinos aproveitan o seu paso pola localidade para descubrir os seus principais atractivos. Dos distintos reclamos existentes, o que máis interese esperta é, con diferencia, a Fervenza do Belelle, seguida das igrexas que se atopan na ruta, especialmente a de Santa María, e posibles rutas de sendeirismo.
Destacan ademais dende a oficina a enorme demanda do servizo de taxi que se oferta para visitas turísticas (traslado e recollida no Pazo de Isabel II dos visitantes que queren desfrutar da Fervenza, coa posibilidade de achegarse tamén ao miradoiro de Ancos).
Durante o trimestre fixeron noite no albergue uns 1.300 camiñantes. A instalación turística, situada xunto á desembocadura do río Xuvia, colgou o cartel de completo cese unha vintena de xornadas, sendo a última a da Festa do Pan de Neda.
A Oficina de turismo, posta en marcha co apoio da Deputación da Coruña, seguirá abrindo todos os días da semana ata mediados de outubro.
