A Xunta de Goberno mobiliza máis de 306.000 euros en 10 asuntos, incrementando nun 50% as axudas para adaptación de vivendas de persoas maiores
A nova convocatoria, logo da súa posta en marcha no anterior exercicio, alcanzará os 150.000 euros de orzamento, permitindo así aumentar ata 2.500 euros o importe máximo por beneficiario
Tamén se resolveron as axudas para as Copas Deputación 2026 e as dirixidas a federacións e agrupacións veciñais da provincia
A Xunta de Goberno da Deputación de Ourense aprobou esta semana un total de dez asuntos, mobilizando 306.116 euros en distintas liñas de actuación centradas no benestar das persoas, a cooperación cos concellos, o impulso ao deporte e o apoio ao tecido social da provincia.
Luis Menor, na rolda de prensa posterior á sesión, subliñou que esta Xunta de Goberno “reflicte o compromiso da Deputación cun modelo de provincia baseado na proximidade, na cooperación cos concellos e na mellora da calidade de vida das persoas, especialmente no rural”.
Menor destacou especialmente a aprobación das bases dunha nova convocatoria de axudas para a adaptación de vivendas de persoas maiores de 65 anos, que será publicada no BOP no mes de maio, cun orzamento de 150.000 euros, o que supón un incremento do 50 % respecto á primeira edición deste programa.
Esta liña de axudas, impulsada pola Área de Benestar e iniciada en 2025, permitirá este ano non só ampliar o orzamento, senón tamén incrementar o importe máximo das subvencións, que pasa de 2.000 a 2.500 euros por persoa beneficiaria
Tal e como lembrou Menor, na súa primeira edición destas axudas atendéronse o 100 % das solicitudes e beneficiáronse 55 persoas en 35 concellos
Explicou tamén que o obxectivo da convocatoria é facilitar que as persoas maiores poidan seguir vivindo na súa casa en condicións de seguridade, autonomía e dignidade, mantendo ao mesmo tempo os seus vínculos sociais e familiares.
Poderán beneficiarse destas axudas: persoas maiores de 65 anos que estean empadroadas en concellos de menos de 20.000 habitantes, deben ser propietarias, usufrutuarias ou arrendatarias da súa vivenda habitual e cun nivel de renda inferior a tres veces o IPREM
Actuacións para mellorar a calidade de vida
As axudas están destinadas a actuacións que permitan mellorar as condicións de habitabilidade e accesibilidade das vivendas, entre elas: a eliminación de humidades e mellora de pavimentos; a adecuación de instalacións de auga, gas, electricidade ou calefacción, ou a instalación de sistemas de seguridade.
Tamén inclúen actuacións clave para a accesibilidade, como son a substitución de bañeiras por pratos de ducha; a adaptación de baños e eliminación de barreiras; a ampliación de portas ou eliminación de desniveis. E tamén contemplan estas axudas a adquisición de equipamento técnico como camas articuladas, cadeiras especiais ou asentos de ducha; e sistemas de mobilización ou apoio
As solicitudes poderán presentarse durante un prazo dun mes, a partires da semana seguinte á súa publicación do BOP, e as axudas concederanse por orde de entrada ata esgotar o crédito dispoñible
Impulso ao deporte en toda a provincia
No ámbito deportivo, a Xunta de Goberno aprobou tamén a resolución das subvencións das Copas Deputación 2026, cun investimento total de 88.116 euros repartidos en 28 axudas.
Estas subvencións permitirán a organización de competicións en múltiples disciplinas deportivas, desde atletismo, natación, voleibol ou ciclismo ata outras como kung-fu, escalada, boxeo, halterofilia ou pickleball, contribuíndo a dinamizar o territorio e a promover valores como o esforzo e o compañeirismo.
Cooperación municipal e mellora de servizos
A sesión inclúe tamén distintas modificacións do Plan provincial de cooperación ás obras e servizos municipais, que afectan aos concellos de Allariz, Rairiz de Veiga, Taboadela e Verea.
Ademais, aprobáronse investimentos concretos para actuacións en Parada de Sil, Viana do Bolo e Xunqueira de Ambía, centradas na mellora de infraestruturas e servizos básicos.
Apoio ao tecido social e veciñal da provincia
No ámbito social, a Deputación resolveu a convocatoria de axudas para o funcionamento das federacións e agrupacións de asociacións veciñais, cun importe total de 43.000 euros, distribuídos entre tres entidades representativas do movemento veciñal ourensán.
Estas axudas permiten reforzar o papel das asociacións como elementos clave para a participación cidadá, a dinamización social e a cohesión territorial, especialmente nos concellos do rural.
