O presidente provincial, Luis Menor, participou hoxe xunto á alcaldesa de San Cibrao das Viñas, Marta Nóvoa, na inauguración desta nova infraestrutura que “se suma a gran oferta de ocio que ten este municipio para a súa veciñanza”
O presidente da Deputación de Ourense, Luis Menor, participou hoxe xunto á alcaldesa de San Cibrao das Viñas, Marta Nóvoa, na inauguración da área recreativa de Rante, na que a institución provincial investiu preto de 100.000 euros.
Esta colaboración materializouse a través do Plan CooperOU con dúas axudas de 47.973 e 48.382 destinadas ao parque infantil composto por xogos para menos e nenas e á pista multideporte para fútbol, baloncesto e tenis, respectivamente. Ambas actuacións realizáronse nuns terreos da comunidade de montes, cedidos ao Concello para usos públicos.
A Deputación investirá ao longo deste exercicio un orzamento que ascende aos 250.132 euros no Concello de San Cibrao das Viñas e, “neste traballo a prol do desenvolvemento social e económico dos territorios, sempre atoparán a man tendida desta institución”, asegurou Menor.
Neste sentido, o presidente provincial reivindicou o “gran traballo de xestión” que está a realizar a alcaldesa de San Cibrao de Viñas “dotando a Rante, un dos pobos que máis está a medrar deste municipio, dunha nova infraestrutura que se vén a sumar a gran oferta de ocio que ten San Cibrao para a súa veciñanza”.
Luis Menor felicitou ao Concello de San Cibrao “por levar a cabo políticas que fomentan o asentamento de novas familias no municipio ofrecendo os mellores servizos posibles á veciñanza, como esta área recreativa, porque é a maneira para frear o despoboamento e asentar poboación no noso rural”.
