Trátanse de entidades sen ánimo de lucro de 14 concellos que recibirán achegas de entre 800 e 5.500 euros para eventos como mostras e festas gastronómicas, de Nadal, roteiros, congresos ou, entre outras, festivais e festas históricas
A Deputación de Pontevedra aprobou hoxe en Xunta de Goberno o reparto de 80.000 euros para que 18 entidades sen ánimo de lucro de 14 concellos da provincia poidan impulsar actividades turísticas neste 2024. En total, as axudas oscilan entre 800 e 5.500 euros e estarán destinadas a eventos como mostras e festas gastronómicas, de Nadal, roteiros, congresos ou, entre outras, festivais e festas históricas. “Somos moi conscientes da importancia do sector turístico para esta provincia e de todo o relacionado con el e non imos escatimar recursos para que Pontevedra siga a ser sinónimo de excelencia en canto a calidade, accesibilidade e sustentabilidade”, asegurou o presidente, Luis López.
En concreto, a Asociación Cultural Aires Novos Castrelo, de Cambados, recibe 4.968 € para a II Mostra dos Viños do Mar; a Sociedade Deportiva Río Ulla, da Estrada, 5.351 € para o Gastrotur do Ulla; a Asociación de Empresarios Grovenses de Bens e Servicios 4.000 € para o Plan Global de Desestacionalización do Turismo do Concello do Grove, e en Lalín a Asociación Amigos do Museo Casa do Patrón contará con 5.500 € para a XXV Malla Tradicional de Lalín, a Asociación Etnográfica de Codeseda con outros 5.500 € para Unha Aldea de Nadal e o Club Roteiros de Lalín con 830 € para os Roteiros de Lalín 2024.
Ademais, a Asociación Cultural Por un Museo do Mar para Marín recibe 1.633 € para o Festival da Memoria do Mar – IV Xornada de Homenaxe ás Mulleres e Homes do Mar; a Asociación Desenvolvemento Galicia Suroeste Eu Rural de Mos 5.500 € para a presentación da primeira parte da campaña da posta en valor dos recursos e servizos locais; a Asociación Internacional para la Cooperación Turística 3.000 € para a celebración en Sanxenxo do I Simposio de Cooperación Turística Internacional; a Asociación Galega de Empresas de Turismo Activo, de Aventura e Natureza (AGETAN) 5.500 € para a celebración en Redondela do II Congreso de Turismo de Observación e Actividades na Natureza de Galicia; a Asociación Deportiva e Cultural de Rande, de Redondela, outros 5.500 € para a XI Conmemoración da Batalla de Rande, e A Rosa dos Ventos Motoclub de Poio 5.500 € para a XIII Concentración Moteira A Rosa dos Ventos.
Por último, a Asociación Amigos da Empanada de Silleda recibirá 5.500 € para a Festa da Empanada; a Asociación de Persoas con Discapacidade Vontade de Tomiño 4.777 € para Río Miño, Marca Inclusiva; o Club Náutico Inclusivo Baixo Miño de Tui 2.995 € para San Simón Inclusivo, e en Vigo a Fundación para la Pesca y el Marisqueo recibirá 2.943 € para a Semana Vigo Pesqueiro 2024, a Asociación Sociocultural e Deportiva Sinergias 360 contará con 5.500 € para a Gastro Movida Summit 2024 e a Orquestra Clásica de Vigo con 5.500 € para Un Camiño Ben temperado 2024.
