Nun encontro celebrado na localidade de Barosa, en Barro, o presidente da Deputación de Pontevedra, Luis López, acompañado polo deputado de Cultura, Reto Demográfico e Xuventude, Jorge Cubela, presentou o innovador programa “O teu espazo xuvenil”. A Concelleira de mocidade do Concello de Baiona, Ruth Álvarez, estivo presente neste significativo evento de apoio á mocidade e a mellora dos espazos destinados a eles na provincia.
O programa “O teu espazo xuvenil” representa un investimento de 100.000 euros destinada a mellorar os equipamentos dos locais xuvenís nos municipios de menos de 20.000 habitantes. Esta iniciativa, que conta co respaldo do 20% de investimento municipal, proporcionará subvencións de ata 1.500 euros para a adquisición de mobiliario, material de oficina, equipos informáticos, acústicos ou audiovisuais, e outros materiais que contribúan a mellorar as instalacións para a mocidade.
O presidente da Deputación de Pontevedra destacou a importancia deste programa no compromiso continuo coa mocidade da provincia “Esta provincia constrúese colectivamente, e o municipalismo é fundamental na acción de goberno da Deputación. A unión de forzas entre as oficinas de mocidade e a Deputación resulta en mellores servizos para a mocidade”, declarou Luis López.
O presidente subliñou a relevancia da mocidade para a Deputación ao detallar os diferentes plans e programas en marcha. Ademais do programa “O teu espazo Xuvenil” a deputación está a desenvolver o primeiro Plan Estratéxico de Mocidade, que incluirá a creación dun Consello Provincial de Mocidade e un espazo web con recursos para a mocidade.
A Concellería de mocidade do Concello de Baiona agradece á Deputación de Pontevedra por esta iniciativa para mellorar os servizos para a cidadanía e construír un futuro próspero para os municipios da provincia.
