As axudas convócanse en colaboración coa Asociación do Deporte Español para sufragar os custos da realización do Curso de Competencias de Dixitalización, Innovación e Tecnoloxía no Ecosistema do Deporte ofrecido pola Universidad Rey Juan Carlos
A Deputación de Pontevedra mantén aberto ata o venres 6 de setembro o prazo de solicitude das 25 bolsas de formación que permitirán que o persoal técnico deportivo das entidades locais da provincia poidan realizar o Curso de Competencias de Dixitalización, Innovación e Tecnoloxía no Ecosistema do Deporte. O obxectivo de acadar esta titulación propia da Universidad Rey Juan Carlos (URJC) é mellorar as súas capacidades nestas tres temáticas, así como en habilidades, cultura e estratexia de xestión de proxectos.
A institución provincial convoca estas axudas en colaboración coa Asociación do Deporte Español (ADESP), a entidade designada polo Goberno de España para impulsar a transformación tecnolóxica do sistema deportivo. As bolsas están valoradas en 2.000 euros cada unha, e darán dereito á realización gratuíta do curso, que consta dun itinerario deseñado para que as persoas participantes obteñan as nocións básicas da transformación dixital. A través del poderán afondar, con orientación e mentorías, en coñecementos máis complexos como, entre outros, big data, ciberseguridade, ferramentas tecnolóxicas, cultura dixital ou metodoloxías de innovación.
Poderanse beneficiar técnicas e técnicos de deportes das administracións locais da provincia de Pontevedra. Á hora de valorar as solicitudes terase en conta a experiencia laboral como técnico deportivo ou similar en administración local, o número de habitantes da provincia ou do concello onde se atope traballando no momento da solicitude, as instalacións deportivas coas que conta dita administración e o seu tipo de relación contractual ou estatutaria.
