Terá lugar o 11 de febreiro e permitirá coñecer as aves da contorna do río Lérez o e Complexo Intermareal Combarro-Lourido
En menos dunha hora esgotáronse este luns as 25 prazas para a segunda das rutas ornitolóxicas deste ano do programa “Voando nas Rías Baixas”, que promove a Deputación de Pontevedra en colaboración con SEO/BirdLife e que se desenvolverá o vindeiro 11 de febreiro cun percorrido polo Estuario do río Lérez e o Intermareal Combarro-Lourido (Pontevedra e Poio).
Acompañados por dous guías de expertos en ornitoloxía de SEO/BirdLife de Pontevedra con experiencia e coñecementos contrastados, os participantes desfrutarán dunha ruta polo Lérez, que verte as súas augas sobre o mar ao fondo da ría de Pontevedra, o que aporta ricos sedimentos ao intermareal Combarro-Lourido, no que as áreas de lodo e area atraen a unha gran diversidade de aves. Desta maneira, nesta contorna destacan as limícolas, coma o pilro común, a píllara cincenta, a píllara real, o mazarico chiador, o virapedras, bilurico patirrubio, a gaivota ou o bilurico das rochas. Non faltan as aves mariñas (coma o mourelo, o carolo, o carrán cristado ou o corvo mariño grande) ou os ardeidos (a garza real ou a garzota); incluso se pode atopar algún cullereiro.
A terceira das rutas contempladas en 2024 no marco deste programa provincial terá lugar o 7 de abril polas Ribeiras do río Umia (Ribadumia e Cambados), para a que se abrirá o período de inscrición o día 25 de marzo. Do mesmo xeito que na ruta por Pontevedra e Poio, tamén se ofertan 25 prazas e poderase anotar na actividade a persoa solicitante xunto con tres acompañantes máis. O percorrido inclúe un autobús tanto para o desprazamento coma para a visita da zona na que ten lugar a actividade e recoméndase levar roupa cómoda e calzado apropiado. Cada participante terá á súa disposición prismáticos para observar aves e dous telescopios terrestres de alta gama para poder gozar das aves sen molestalas. Ademais, entregaráselle unha guía de aves.
En total, son sete as rutas ornitolóxicas programadas este ano ao abeiro de “Voando nas Rías Baixas”. Despois das Ribeiras do río Umia, o programa continuará en maio pola Serra do Suído (A Lama, Fornelos de Montes e Covelo), en xuño pola praia da Lanzada (O Grove), en setembro polas lagoas de Rouxique (Sanxenxo) e en novembro polo esteiro do río Miño (A Guarda).
