“Trátase dun asunto da máxima relevancia para o futuro da provincia, de Galicia e de España e como Deputación queremos ser altofalante deste proxecto”, remarcou o presidente provincial
O presidente da Deputación de Pontevedra, Luis López, adiantou en conferencia de prensa que o grupo do Partido Popular defenderá unha moción no próximo Pleno para acadar a unanimidade da Corporación Provincial en torno ao AVE Vigo-Porto e solicitar ao Goberno de España que se comprometa realmente tanto con esta liña como co tren de mercancías. “Trátase dun asunto de máxima relevancia para o futuro da provincia, de Galicia e de España e como Deputación queremos ser altofalante deste proxecto”, remarcou o presidente quen tamén engadiu que “a voz colectiva da provincia, representada no Pleno, se faga escoitar unanimemente para facer forza” e amosou o seu convencemento de que “poderemos acadar un alto consenso no Pleno, porque existe un amplo consenso fóra, na rúa”.
López recordou que “onte en Vigo escenificamos con absoluta claridade a unidade que existe a ambos lados da Raia en torno á reclamación da Alta Velocidade ferroviaria entre Vigo e Porto” e informou que no mesmo acto tamén asinou un manifesto que sintetiza esta demanda para impulsar esta liña estratéxica para o dinamismo empresarial e a cohesión territorial da Eurorrexión. “Trátase de atender a unha das zonas máis densamente poboadas de Europa e unha das fronteiras máis permeables da Unión” remarcou López quen apelou á necesidade de “comprometer prazos, partidas, axilidade e concrecións para que o AVE Vigo-Porto sexa unha realidade canto antes”.
Para o presidente provincial “sabemos que o Goberno de España ten preferencia pola liña Lisboa-Madrid, pero tamén sabemos que Portugal está ao noso carón”. Neste eido asegurou que “Portugal está a representar mellor os intereses da provincia que Pedro Sánchez” e insistiu en que “temos os argumentos, temos os aliados, temos a unidade social e empresarial e temos o dereito a reclamar unha infraestrutura vital para o noso futuro”.
