O presidente provincial salienta os froitos da colaboración cos concellos para seguir mellorando a seguridade e mobilidade peonil na rede de estradas provinciais
O presidente da Deputación de Pontevedra, Luis López, pon en marcha unha nova actuación para a mellora da rede viaria provincial coa sinatura do convenio de colaboración co Concello de Oia para executar o proxecto de mellora da mobilidade peonil na estrada EP-2202 entre Baiona e Loureza, no termo municipal de Oia. O acordo cerrouse este mércores coa sinatura do convenio de colaboración entre o presidente Luis López e a alcaldesa Cristina Correa, a través do cal a Deputación achega o 80 % do orzamento, uns 130.000 euros; e a administración local os 35.000 euros restantes. “Na axenda do goberno provincial a mellora da nosa rede viaria ocupa sempre un oco principal. Tanto é así que comezamos o ano como pechamos o anterior, mellorando as estradas”, sinala o dirixente provincial.
O proxecto, valorado nun total de 165.000 euros, céntrase na creación dun itinerario peonil duns 170 metros de lonxitude na marxe esquerda da EP-2202 entre as localidades de Baiona e Loureza ao seu paso polo Concello de Oia. Así mesmo, a obra contempla a reposición do firme neste treito, a renovación da rede de drenaxe, a implantación de pasos de peóns sobreelevados, o acondicionamento dunha zona verde e a mellora e modernización da iluminación e do mobiliario urbano. “Unha actuación integral coa garantía de calidade e seguridade da Deputación neste tipo de actuacións”, resume o presidente.
Non é a única iniciativa en materia viaria que a Deputación está a desenvolver no concello de Oia. A través do acordo marco de conservación de firmes e do acordo marco de cunetas de seguridade estase a levar a cabo dúas actuacións na EP-3202 entre Oia e Torroña.
