O presidente da Deputación de Pontevedra recibiu este luns no Pazo Provincial ao alcalde de Dozón, Adolfo Campos, para asinar un convenio de colaboración enmarcado no programa PON2030
O presidente da Deputación de Pontevedra, Luis López, recibiu este luns no Pazo provincial ao alcalde de Dozón, Adolfo Campos, para asinar un convenio de colaboración enmarcado no Programa Provincial de Infraestruturas e Dotacións Singulares para a Execución da Axenda 2030 (PON2030) a través do cal o goberno provincial financiará con 350.000 euros, o 77 % do orzamento, os traballos para a conversión dun edificio no Castro de Dozón nun centro sociocultural. O Concello, pola súa banda, achega o 23 % restante, máis de 100.000 euros. Un acordo que avanzar no reto demográfico a través da mellora dos servizos á cidadanía co obxectivo de fixar poboación en concellos rurais como o de Dozón.
A obra, valorada nun total de 450.000 euros, servirá para dotar á veciñanza do municipio de Dozón dun centro sociocultural no que organizar eventos culturais, cursos ou reunións veciñais. O proxecto contempla a reestruturación dos espazos interiores da planta baixa e o semisoto do edificio, así como unha mellora integral dos sistemas de illamento e eficiencia enerxética. Na planta baixa instalarase unha sala polivalente, unha de lectura e de informática e un salón de actos. Mentres que no semisoto instalaranse dúas aulas de formación, un despacho e un obradoiro de cociña. Ao mesmo tempo, a proxecto inclúe a reformar dos cuartos de baño, a renovación da iluminación con tecnoloxía LED, a substitución da rampla exterior para mellorar a accesibilidade, a mellora do illamento térmico da envolvente e a reposición das carpinterías exteriores.
Segundo recolle o convenio, as obras deberán estar rematadas antes do 30 de abril de 2025. A sinatura deste protocolo entre Deputación e Concello de Dozón realízase coa modificación das bases do programa PON2030 xa en vigor. Unha modificación que fai compatible a achega da Deputación coas subvencións doutras administracións sen que o montante concedido ao Concello polo goberno provincial se vexa reducido.
A sinatura deste protocolo supón un novo exemplo de cooperación institucional entre a Deputación e, neste caso, o Concello de Dozón para transformar as instalacións públicas e mellorar os servizos destinados á veciñanza.
