Máis de 400 escolares de tres centros educativos da vila desfrutarán deste filme dirixido por Chelo Loureiro que se proxectará ás 11:30 horas
O Auditorio do Grove acollerá este xoves 26 de outubro a proxección do filme de animación ‘Valentina’ ao abeiro da segunda edición do Ciclo Mestre Mateo, promovido pola Academia Galega do Audiovisual e a Deputación para achegar as longametraxes de ficción e documentais finalistas dos premios do audiovisual galego aos concellos da provincia. A sesión para a exhibición desta película, dirixida por Chelo Loureiro e finalista nesta categoría dos premios, terá lugar ás 11:30 horas e desfrutarán dela máis de 400 escolares de tres centros educativos da vila.
O filme amosa a historia de Valentina, unha nena que soña con ser trapecista, pero que cre que nunca poderá conseguilo por ter a síndrome de Down. A película está tamén producida por Chelo Loureiro, xunto a Noa García, Brandán de Brano, Mariano Baratech e Luís da Matta, e conta coas voces de Andrés Suárez, María Manuela, Uxía e Pilocha, entre outras, cunha banda sonora obra de Nani García.
Ademais do Grove, o ciclo chegou este ano aos concellos da Guarda, A Estrada, Caldas e Baiona. Estes municipios están a exhibir unha programación que inclúe as películas, ‘María Casares, a muller que viviu mil vidas’, ‘Unicorn Wars’ e ‘O corpo aberto’, recoñecidas respectivamente como mellor documental, mellor longametraxe de animación e mellor longametraxe na última edición dos Mestre Mateo. O resto de títulos son finalistas destes galardóns, como os documentais ‘Onde máis doe’ (Manane Rodríguez, 2022); ‘Non somos nada’ (Javier Corcuera, 2022) e ‘A foreign song’ (César Souto, 2022), así como as películas ‘Live is life’ (Dani de la Torre, 2022) e ‘Código Emperador’ (Jorge Coira, 2022).
