O concelleiro de Festas, Demetrio Gómez fixo hoxe balance da Feira Franca, unha edición que considerou moi emocionante e das máis complexas dende o punto de vista da organización.
O concelleiro de Festas, Demetrio Gómez destacou que « foi unha Feira Franca realmente emocionante ». Lembrou ao respecto da organización que « estivemos cos nervos a flor de pel para que todo funcionase correctísimamente. Foi, probablemente, das Feiras francas máis complexas de organizar pola noite do venres para o sábado » cando as condicións meteorolóxicas foron moi malas « e ainda así saiu todo perfectamente ».
« Eu considero que a mellor maneira de valorar a Feira Franca é que as cousas foron como debían ser e que as pontevedresas e os pontevedreses non precisaron para nada da organización da Feira Franca. Puideron gozar tanto o venres pola noite como o sábado, simplemente para disfrutar da festa, para gozar, para pasarlo ben. Non houbo incidentes reseñabeis, e o domingo a cidade estaba perfectamente organizada para retomar a normalidade », indicou Demetrio Gómez.
O concelleiro agradeceu o traballo « a todo o personal do Concello, a todas as empresas de Pontevedra e de fóra de Pontevedra que traballan connosco durante a Feira Franca e, por suposto, a todas as pontevedresas e a todos os pontevedreses que saben saír á rua, disfrutar da festa, disfrutar da cidade, facer que Pontevedra volva a vivir o século XV e que isto vaia como un auténtico reloxo ».
