“Hoxe é un gran día porque con eles imos facer que o Concello sexa un pouco máis áxil”, asegura o alcalde, Gonzalo Jácome, que recibiu aos novos profesionais, que se suman ao Centro de Innovación Tecnolóxica
O Concello de Ourense conta desde hoxe con 10 novos enxeñeiros informáticos que reforzarán o traballos de investigación e desenvolvemento que realiza o Centro de Innovación Tecnolóxica do Concello en La Molinera.
O alcalde, Gonzalo Pérez Jácome, recibiunos esta mañá no salón de plenos, onde tomaron posesión das súas novas prazas. Pérez Jácome destacou que “hoxe é un gran día porque se incorporan 10 enxeñeiros informáticos e con eles imos facer que o Concello sexa un pouco máis áxil”. A incorporación dos novos profesionais, avanzou, “vaise notar moito porque é un corpo importante de persoal cualificado en temas tecnolóxicos”.
Os enxeñeiros informáticos desenvolverán o seu traballo no Centro de Innovación Tecnolóxica do Concello, un espazo onde, explica o alcalde, “queremos facer aplicacións de intelixencia artificial que teñan un aproveitamento directo no Concello de Ourense, e que ademais vai ser o xerme do que debería ser no futuro un centro de investigación esponsorizado e sustentado pola Xunta de Galicia e o estado español”.
O centro municipal, subliña o rexedor, “é un xerme de investigación e desenvolvemento e será ademais unha dinamización absoluta tecnolóxica para o Concello de Ourense”. Os dez enxeñeiros tomaron posesión, polo que “hoxe é un gran día para o Concello e para a cidade de Ourense”, concluíu Pérez Jácome.
