O vicepresidente da Deputación de Pontevedra, Rafa Domínguez, asistiu hoxe no Arquivo provincial á presentación do libro editado pola institución provincial ‘Fronteiras habitadas’, do artista moañés Xavier Ríos. O vicepresidente sinalou que o artista “xoga coas figuras dunhas siluetas que nos amosan unha realidade desoladora, unha traxedia colectiva que fai que nos miremos como sociedade fronte á pobreza, fronte á inxustiza e fronte á falta de liberdades e dereitos”, como son os movementos migratorios. Rafa Domínguez asegurou que ‘Fronteiras habitadas’ é “un convite a que non apartemos a nosa mirada ante unha realidade que temos diante dos ollos”, un “drama” no que esas persoas “son empregadas como peóns, como pezas dun taboleiro e con fins interesados”.
Na presentación tamén asistiron Xaime Toxo e Anna R. Figueiredo, dúas das voces da literatura galega actual (xunto con Xosé Daniel Costas, Míriam Ferradáns, Paulo Vilar Millán e Lucía Novas) que interpretan e acompañan as imaxes de Xavier Ríos no libro a través de textos da súa autoría.
