Podemos Ourense vén de presentar unha solicitude ao Concello de Ourense para que se establezan plans de cofinanciación coa Xunta de Galicia e co Goberno do Estado co obxectivo de instalar placas solares en edificios municipais e modernizar a iluminación pública da cidade.
Desde Podemos cremos que esta medida suporía un aforro económico importante para as arcas municipais, ademais de avanzar cara a un modelo enerxético máis limpo e sostible.
En canto á iluminación pública, desde Podemos Ourense defendemos a substitución das actuais farolas por outras que funcionen con enerxía solar e incorporen sensores intelixentes, que regulen a intensidade segundo a presenza de persoas ou vehículos.
“Trátase de apostar por unha cidade máis eficiente, máis sostible e que respecte a biodiversidade. Non podemos seguir gastando de máis nin ignorar o impacto da contaminación luminosa”, sinalou Francisco Diéguez.
A formación lembra que a contaminación luminosa afecta negativamente a determinadas especies animais da cidade e que existen tecnoloxías dispoñibles para reducila sen renunciar á seguridade nin á boa visibilidade nas rúas.
En conclusión, este plan suporía un triplo beneficio:
- Aforro económico para o Concello.
- Avance na loita contra o cambio climático a través do uso de enerxías renovables.
- Protección da biodiversidade ao reducir o impacto da contaminación luminosa.
