A nova instalación ten espazo para asegurar simultaneamente dez bicicletas diferentes, e está localizada na parte traseira do edificio
A Deputación de Pontevedra pon desde hoxe a disposición dos seus traballadores e da cidadanía en xeral da cidade de Pontevedra un novo aparcamento de bicicletas situado na parte traseira do Edificio Administrativo, na contorna do Parque das Palmeiras. A nova instalación está formada por cinco aneis, que permiten asegurar de maneira simultánea un total de dez bicicletas, tanto convencionais como eléctricas, minimizando así o risco de roubo.
En concreto, trátase dun aparcabicis instalado pola empresa Setga que está conformado por cinco aneis que alcanzan os 75 centímetros de altura. Fabricados con aceiro inoxidable, os aneis destacan polo seu comportamento fronte á corrosión, polo que teñen unha gran resistencia ante a acción da climatoloxía e do paso do tempo.
Con esta nova instalación, o obxectivo do goberno provincial é promover e potenciar a mobilidade sostible e saudable, fomentando o uso da bicicleta para desprazarse pola cidade, fronte a outros medios de transporte máis contaminantes, sobre todo no caso de traxectos cortos. Responde, ademais, á crecente demanda que se está a observar nos últimos tempos por este tipo de instalacións.
