Xaquín Moreda deu orde de trasladar á Seca o plan de mellora urbana e ambiental do que se xa se teñen beneficiado outros barrios do concello.
Substituíronse a led as 78 luminarias, fíxose un zafarrancho especial, rozáronse as parcelas perimetrais de todo barrio chegando incluso até Tafisa, e estanse a facer traballos de construción coa reparación de canles de augas pluviais, reposición de beirarrúas, eliminación de humidades, acondicionamento de escavas.
O departamento de Servizos Urbanos Básicos, que dirixe Xaquín Moreda trasladou nestas semanas o Plan de mellora urbana e ambiental ao barrio da Seca. Este plan naceu neste mandato para materializar a prioridade marcada polo alcalde Miguel Anxo Fernández Lores de manter en óptimas condicións de mantemento e estado de conservación os espazos públicos.
Xaquín Moreda decidiu trasladar ao barrio da Seca -dende a rúa da Seca até o barrio pasada a pasarela do tren- esta mellora urbana e ambiental facendo unha supervisión integral dos espazos públicos e actuando naqueles aspectos que precisaran unha mellora. Iluminación, limpeza, rozas e pavimentos, foi a prioridade marcada.
A actuación comezou cun zafarrancho de limpeza especial e integral de toda a zona, desratización incluída como soe ser habitual nestas limpezas singulares. Ademais se realizou unha roza dos espazos periurbanos do barrio chegando incluso a algunha parcela municipal situada nas proximidades da antiga Tafisa.
Tamén se fixo unha renovación da iluminación do barrio. Substituíronse 78 luminarias por tecnoloxía led, e reparáronse e cambiáronse pezas dos cadros eléctricos, ademais de limpar fustes e báculos. Esta actuación tivo un custe de 16.924,21 euros -o resto da mellora do barrio realízase cos contratos de mantemento do Concello de Pontevedra-.
A última fase execútase nestes días coa reparación de beirarrúas, limpeza e reposicion de canles de augas pluviais, formigonado dalgunha beirarrúa para evitar humidades nalgunha vivenda, acondiconamento de escavas que estaban levantados polas raíces das árbores, e outras pequenas actuacións de construción que pretenden devolver os espazos públicos do barrio a un estado óptimo de uso e goce da veciñanza.
Este plan de mellora urbana e ambiental xa se realizou noutros barrios da cidade como en Estribela, a praza das Regas, no ámbito da rúa Domingo de Andrade (en beiramar) ou no Campo da Torre.
