• A choiva non impediu que se celebrase unha andaina de 8 quilómetros por diferentes lugares da vila termal
• Previamente procedeuse á lectura do manifesto a cargo do alcalde, Jacobo Pérez, e a edil de Igualdade, María del Carmen Torres Iglesias, ademais da proxección do vídeo ‘Raíñas de Caldas’, onde se recoñece a importancia na historia da localidade das súas veciñas
Este sábado Caldas de Reis celebrou os actos principais da ampla programación deseñada con motivo do Día Internacional da Muller. Neste 8 de marzo, un importante número de veciñas e veciños da vila, representantes de colectivos locais e autoridades locais participaron nas iniciativas, que se iniciaron coa presentación oficial do vídeo ‘Raíñas de Caldas’, unha proxección que rende homenaxe ás veciñas da vila, recoñecendo a súa importancia “na historia do noso pobo; elas foron e son decisivas na súa orixe, mantéñeno vivo e garanten o seu futuro, grazas ao traballo que desenvolven a todos os niveis. Temos moito que agradecerlles”, indicou o alcalde. No vídeo, que xa está a disposición da veciñanza nas redes sociais do Concello e que foi enviado ao tecido asociativo, empresarial e hostaleiro da vila, recóllense esceas costumbristas nas que as mulleres son protagonistas. Ademais, tamén fai mención a persoeiras históricas, como Dona Urraca, que “fixo de Caldas un lugar de referencia na súa época”, ou veciñas como a futbolista Lucía Rivas, internacional nas categorías inferiores da Selección Española e campiona de Europa sub-17 o pasado mes de maio. A proxección do vídeo e a lectura do manifesto, a través do cal o Concello de Caldas reafirma o seu compromiso á hora de impulsar durante todo o ano iniciativas que garantan a igualdade de condicións en todos os eidos da sociedade, tiveron lugar no Auditorio Municipal. Posteriormente, a chuvia non impediu a realización da Andaina pola Igualdade, que se iniciou no Paseo Román López e que percorreu varios emprazamentos da vila termal.
