A dirección do Partido Popular de Pontevedra elixiu ao equipo que se encargará da organización e desenvolvemento da campaña electoral para as eleccións xerais na provincia de Pontevedra e que encabeza a secretaria xeral, Luisa Piñeiro.
Os populares manteñen practicamente o mesmo equipo que dirixiu a campaña dos populares nas eleccións de maio. Así, ademais de Luisa Piñeiro como directora de campaña, tamén forman parte do comité Alberto Pazos, como director adxunto; Natalia Prieto, como coordinadora de programas; Javier Tourís, responsable de acción electoral; Valentín García, responsable de campaña para os dirixentes nacionais; e José Balseiros, de actos sectoriais.
Ademais deles, haberá tamén un xerente de campaña, un responsable de prensa e medios, responsable de interventores e apoderados, e un responsable de actos públicos.
Luisa Piñeiro destaca que “temos por diante semanas de intenso traballo, desde o PP de Pontevedra estamos preparados para afrontar as eleccións do 23 de xullo e contribuír a que Núñez Feijóo sexa o próximo presidente de España”. Nesta liña, di que “afrontamos esta nova cita con moita forza, moita ilusión e plenamente convencidos de que é necesario un cambio en España. Porque o que se decide en xullo é o futuro do noso país, e estou convencida de que a nosa provincia volverá a demostrar nese momento que somos maioría os que apostamos por un Goberno fiable, estable e con sentidiño liderado por Núñez Feijóo”.