O presidente de AFAGA Alzheimer, Juan Carlos Rodríguez, deu lectura no Pleno a unha iniciativa que reclama máis investigación, acceso aos avances diagnósticos e terapéuticos e unha atención integral ás persoas afectadas e ás súas familias
O Pleno do Concello de Mos celebrado onte no Pazo de Mos aprobou por unanimidade a moción conxunta sobre o apoio á investigación, ao diagnóstico e aos avances terapéuticos na enfermidade de Alzheimer.
O presidente de AFAGA Alzheimer, Juan Carlos Rodríguez, foi o encargado de dar lectura á moción durante a sesión plenaria, nunha iniciativa que pon o foco na necesidade de seguir avanzando no coñecemento da enfermidade e de facilitar que os novos avances poidan chegar ás persoas afectadas.
O texto sinala que nos últimos anos se produciron avances tanto no diagnóstico como no ámbito terapéutico, abrindo novas posibilidades para a detección precoz e o tratamento da enfermidade. Neste contexto, a moción reclama ás administracións competentes que continúen reforzando o apoio á investigación e ao desenvolvemento de novas alternativas terapéuticas.
Entre os acordos aprobados figura tamén o de instar ás administracións competentes á promoción da participación dos pacientes en ensaios clínicos e proxectos de investigación, sempre entre as persoas que cumpran os criterios establecidos. A moción reclama, ademais, que os avances diagnósticos e terapéuticos que acrediten a súa seguridade, eficacia e beneficio clínico poidan incorporarse ao Sistema Nacional de Saúde unha vez avaliados e autorizados polos organismos competentes.
O Concello de Mos comprométese igualmente a impulsar a adaptación progresiva dos sistemas e servizos sanitarios ás novas necesidades derivadas destes avances, contando coa participación dos profesionais sanitarios e establecendo as follas de ruta necesarias para a súa implantación.
Outro dos puntos recolle a necesidade de garantir a equidade e a igualdade de acceso, con independencia do lugar de residencia das persoas afectadas, así como de continuar reforzando unha atención integral e sociosanitaria que teña en conta non só as necesidades dos pacientes, senón tamén as das súas familias e das persoas coidadoras.
A moción inclúe finalmente un recoñecemento ao labor de AFAGA Alzheimer na atención ás persoas afectadas e ás súas familias, así como no ámbito da sensibilización social, a formación, a prevención e a promoción da investigación.
A aprobación por unanimidade permitiu reunir o apoio de todos os grupos municipais arredor dunha iniciativa que sitúa a investigación e a mellora da atención ás persoas con Alzheimer entre as cuestións a seguir abordando desde o ámbito institucional.
