O voceiro nacionalista, Fran Leiro, advirte de que a insistencia do alcalde de prolongar os recursos xudiciais disparán os custes ata preto dos 15 millóns de euros, incluíndo xuros e intereses
Os nacionalistas advirten de que, se o Tribunal Supremo confirma a decisión do TSXG de non permitir o pago fraccionado da sentenza,
Sanxenxo pasará a ser un dos concellos máis endebedados da provincia
O Bloque Nacionalista Galego (BNG) de Sanxenxo advirte de que a teima do alcalde, Telmo Martín, de dilatar o proceso xudicial da sentenza da finca das Cunchas supón “un novo ataque ao peto da veciñanza”. Esta é a guinda a unha “pésima xestión da súa política de cemento”, que moi probablemente abocará ao Concello a ter que facer fronte a unha situación económica moi complicada nos vindeiros anos. Os nacionalistas, que xa advertiron en varias ocasións dos problemas que conlevaría a política de ladrillo do señor Martín, especialmente no que se refire ao proceso xudicial coa familia Rocafort, alertan de que a decisión do alcalde de recurrir a resolución do Tribunal Superior de Xustiza de Galicia (TSXG), na que descarta a opción de pagar de xeito fraccionado os 10 millóns de euros pendentes aos propietarios da parcela, “para o único que serve é para que Telmo Martín pretenda gañar tempo, a costa de castigar as arcas municipais”.
O voceiro do BNG, Fran Leiro, xa advertira desta situación no Pleno de xaneiro, cando se aprobou o Orzamento de 2024. Foi entón cando o edil nacionalista adiantou que, en caso de producirse o rexeitamento do fraccionamento por parte do Tribunal Supremo, Sanxenxo veríase abocado a converterse nun dos concellos máis endebedados da provincia para afrontar ese pago. No caso de que o recurso presentado polo Concello ante o Tribunal Supremo tamén fracase, os custes totais do proceso poderían superar os 15 millóns de euros, incluíndo os xuros e intereses que se seguen a xerar mentres non se abone a parcela. “O señor Martín segue empeñado en levar a Sanxenxo á bancarrota”, criticou Leiro, que lembra que o Concello xa tivo que face fronte a pagos por valor de máis de 20 millóns de euros como consecuencia de resolucións xudiciais provocadas pola política de cemento e ladrillo de Telmo Martín. “Este é un feito sumamente grave, especialmente se temos en conta que o señor Martín asegurou no seu día que se era elixido alcalde a adquisición da parcela das Cunchas tería un custe de 0 euros. Unha mentira flagrante máis que engadir ás moitas que xa formulou, como a da suposta baixada de impostos, que demostrou ser todo o contrario”, subliñou Fran Leiro.
O voceiro nacionalista ten claro que “non vai ser Telmo Martín quen pague o pato, senón os veciños e veciñas e futuras Corporacións”. Leiro incide en que esta “fuxida cara adiante” do Goberno do Partido Popular é a razón da suba de impostos aprobada hai uns meses. “O señor Martín garantiu en campaña electoral que ía baixar impostos e agora, en menos dun ano, xa subiu varios e mesmo se inventa algún novo, como o dos vados”, concluíu o concelleiro do BNG.
