Os nacionalistas lembran que foi a política especulativa e de formigón do alcalde, centrada na construción de segundas residencias, a que forzou a un gran número de mozos e mozas de Sanxenxo a ter que marchar do seu concello
Desde o Bloque teñen claro que o anuncio dun rexistro de vivenda pública é un ‘deja vu’ co que o alcalde “non vai conseguir enganar de novo á veciñanza”, como xa fixo coa creación de Ínsula en 2006, unha entidade pública que costou miles de euros e que estivo dez anos sen ningún tipo de actividade
O grupo municipal do Bloque Nacionalista Galego (BNG) de Sanxenxo insta a Telmo Martín a que non trate de enganar á veciñanza coa súa nova cortina de fume sobre vivenda pública. A anunciada creación dun rexistro para coñecer, supostamente, a demanda real deste tipo de vivendas é, en realidade, un ‘deja vu’ que non fai máis que deixar patente unha obviedade: o Partido Popular leva décadas sen construír unha soa edificación destas características en Sanxenxo.
O grupo nacionalista fai fincapé no irónico que resulta que o señor Martín, que é o principal responsable de que na actualidade practicamente non existan residencias para todo o ano no concello con prezos asumibles, como consecuencia da súa política urbanística baseada no formigón e na especulación, fale de impulsar este tipo de actuacións. “Pedísmolle a Telmo Martín que non engane nin confunda á cidadanía, porque o que está claro é que xa se atopa en campaña electoral, prometendo vivenda pública cando durante 20 anos non se preocupou o máis mínimo por dar resposta a esta demanda, nin el nin a Xunta de Galicia do Partido Popular”, sinala o Bloque. Neste sentido, hai que lembrar que foi o propio Telmo Martín quen creou a entidade pública Ínsula Sanxenxo, supostamente para impulsar vivendas para xente moza, aproveitando o 10% de cada desenvolvemento urbanístico que consta no PXOM. “Gastáronse miles de euros na creación dunha entidade que impulsou cero vivendas e que permaneceu sen actividade dez anos, ata que no 2016 o Goberno do tripartito a utilizou para xestionar a Feira Multisectorial de Portonovo”, lembran desde o BNG. Os nacionalistas tamén recordan que no seu día a Xunta de Galicia xa abriu un rexistro un rexistro sobre vivenda pública que non serviu para nada. “Houbo xente que pagou cartos para algo que nunca se fixo realidade”, sinala o voceiro do BNG, Fran Leiro. O grupo da oposición responsabiliza a Telmo Martín e á súa política especulativa do contexto actual, no que “resulta pouco menos que imposible atopar unha vivenda para todo o ano en Sanxenxo, o que obrigou a que nos últimos 20 anos un gran número de mozos e mozas que naceron aquí tivesen que marchar a outros concellos, ante a falta de oferta pública, xa que todo o que se constrúe se destina a segundas vivendas. Ese é o legado da política de cemento do alcalde”, inciden desde o Bloque.
Por último, o BNG tamén recorda que a construción de vivenda pública é unha competencia da Xunta de Galicia, polo que un hipotético desenvolvemento deste tipo de construcións “non pode ser asumido polos veciños e veciñas de Sanxenxo, algo que xa aconteceu coas garderías municipais e co Centro de Día, que está a pagar o Concello cando debería facelo a Administración autonómica, no que é unha proba máis da incapacidade de xestión do señor Martín”.
