Os nacionalistas presentarán unha moción solicitando que o espazo deixe de facer referencia ao rei emérito actual, logo de que nos últimos anos saísen á luz múltiples informacións que “provocaron un rexeitamento profundo a nivel social sobre o antigo xefe do Estado”
O Bloque aposta porque se acometa unha modificación na nomenclatura na que se implique a veciñanza, garantindo un proceso transparente “e de consenso unánime”
O grupo municipal do Bloque Nacionalista Galego (BNG) de Sanxenxo proporá ao Pleno da Corporación o cambio de nome para o Porto Deportivo, actualmente denominado Juan Carlos I. Esta solicitude abordarase nunha moción que os nacionalistas presentarán na vindeira sesión plenaria ordinaria de xullo, prevista para o luns día 28 (10.00 horas). O grupo da oposición, dentro da súa proposta, aposta, ademais, porque ese cambio de nomenclatura se leve a cabo desde a limpeza democrática e o “consenso unánime”, implicando á veciñanza.
Na súa exposición de motivos, os nacionalistas lembran que o nome dos espazos públicos non deixan de ser “unha expresión dos valores que a cidadanía desexa representar e proxectar. No caso do Porto Deportivo, o Porto Deportivo Juan Carlos I fai referencia ao actual rei emérito, inmerso en diferentes polémicas. Ao longo dos últimos anos saíron á luz pública múltiples información relacionadas coa conduta do antigo xefe do Estado, situacións que, tal e como denuncia o Bloque, “xeraron un profundo rexeitamento social” e que afectan gravemente á imaxe pública e a todo o relacionado coa súa persoa e entidades públicas. Entre estas información figuran a existencia de contas opacas no estranxeiro, “vencelladas a presuntas actividades de branqueo de capitais”; a recepción e envío de comisión millonarias sen xustificación transparente, o uso recorrente de testaferros para ocultura patrimonio, a utilización de voos privados sufragados por terceiros ou diversas denuncias persoais.
“Estes feitos, sumados a un crecente sentimento cidadá en favor da transparencia, a ética pública e a limpeza institucional e democrática, fan incompatible manter o nome do Porto Deportivo nas institucións públicas do Estado e, polo tanto, no noso concello”, sinalan desde o BNG.
Á hora de propiciar esta modificación do nome das instalacións portuarias, o Bloque aposta por incentivar a participación cidadá, de xeito de que a nova nomenclatura deste espazo se realice garantindo “a transparencia e a limpeza democrática”.
