Os nacionalistas lembran que as ruínas do edificio que quedou a medio construír hai xa practicamente 30 anos á altura do 146 son un símbolo do “feísmo” provocado pola falta de xestión de Telmo Martín
Fran Leiro recorda que veciños e veciñas da contorna xa amosaron en varias ocasións o seu malestar pola situación de insalubridade da parcela
O grupo municipal do Bloque Nacionalista Galego de Sanxenxo lamenta que, a piques de rematar o ano 2024, aínda siga en pé un dos grandes elementos do feísmo de Sanxenxo, que “simboliza á perfección a política de formigón de Telmo Martín”. Trátase do esqueleto en ruínas do edificio que quedou a medio construír hai xa practicamente tres décadas á altura do número 146 da Rúa Progreso, nas inmediacións da rotonda de Arnelas. Uns restos de cemento que continúan nun preocupante estado de abandono e que xa foron motivo de queixas en varias ocasións por parte de veciños e veciñas da contorna.
Os nacionalistas recordan que o feito de tapar parte da infraestrutura con lonas publicitarias “non é unha media suficiente” para poñer fin a unha situación vergoñenta. “Ter esa ‘mole’ na entrada de Sanxenxo durante tanto tempo sen que se tomen medidas é lamentable”, sinala o voceiro do Bloque, Fran Leiro. Se ben é certo que nos últimos anos os propietarios da parcela procederon a realizar tarefas de limpeza e de tapiado do que sería a entrada do garaxe, desde o BNG teñen claro que esta infraestrutura debería desaparecer no menor tempo posible. “Tempo houbo de sobra para que o proxecto inicial se axustase á normativa.
O que non é de recibo é que as persoas residentes nas inmediacións teñan que seguir erguéndose cada mañá a carón dese foco de insalubridade”, sinala Leiro.
O BNG recorda que este non é o único punto abandonado na Rúa Progreso por parte do Concello. Sucede outro tanto coa parcela situada entre a devandita rúa e a Avenida Madrid, á altura do paso de peóns da Florida. Un espazo que tamén está totalmente abandonado e deteriorado. “A inacción do Goberno local do formigón é preocupante”, conclúen os nacionalistas.
