Lucía Santos e Tino Iglesias insisten en medidas concretas como as xestións oportunas para pedir ao INVIED a mellora dos terreos situados na barriada Virxe do Carme e a creación dunha Mesa de Mobilidade para garantir solucións inclusivas e efectivas ao problema do aparcamento
A problemática da falta de aparcamento en Marín converteuse nun asunto de máxima urxencia para a veciñanza, especialmente durante os días de festa. A eliminación do aparcamento a carón do porto agravou aínda máis a situación, dificultando a vida diaria tanto dos residentes como dos visitantes.
O Bloque Nacionalista Galego (BNG) leva tempo trasladando propostas para solucionar este problema. Entre as súas iniciativas destacaron a creación de aparcadoiros temporais en Méndez Núñez e o estudo dun aparcamento en altura na zona da Dichosa. Non obstante, estas propostas foron ridiculizadas polo PP.
Tralas negativas do goberno do Partido Popular, o BNG continúa facendo os deberes e presentando novas propostas para mellorar a calidade de vida da veciñanza. No pleno municipal celebrado o pasado 11 de xullo, o concelleiro Tino Iglesias reiterou a urxencia de tomar medidas concretas para mellorar a situación da mobilidade, do tráfico e dos problemas de aparcamento. Iglesias subliñou, como xa o fixera no pleno do 13 de xuño, a necesidade de levar a cabo a creación dunha Mesa de Mobilidade que permitiría a participación activa de todos os actores implicados, asegurando que se adopten decisións que beneficien a toda a comunidade.
Ademais, a voceira do BNG, Lucía Santos, solicitou á alcaldesa María Ramallo que se inicien de inmediato as xestións oportunas para pedir ao INVIED a mellora dos terreos da súa propiedade situados na barriada Virxe do Carme. Esta zona de aparcamento, situada xunto á pradeira do río Lameira, atópase en pésimas condicións debido ás intensas chuvias deste inverno, que converteron o chan en lameiras e formaron socavóns de grandes dimensións, dificultando o paso de vehículos e, en consecuencia, o aparcamento.
A situación do aparcamento en Marín exemplifica un desafío urbano común que esixe unha resposta coordinada e eficiente. É fundamental que o goberno municipal actúe con responsabilidade e compromiso para garantir infraestruturas adecuadas que melloren a calidade de vida da veciñanza e fomenten a actividade económica local. O BNG continuará traballando para que as súas propostas sexan consideradas e implementadas, buscando sempre o benestar e a seguridade da veciñanza.
