• Raquel Martínez: “Os poucos elementos do mobiliario urbano que existen están deteriorados – bancos e papeleiras rotas, cravos soltos, valos abandonados – que representan o abandono habitual do BNG no goberno local”
• Os populares defenderán unha moción no Pleno para reclamar a rehabilitación e posta en valor do Muíño do Coto, coa eliminación das pintadas, a retirada do lixo e o seu acondicionamento para garantir a súa protección e uso didáctico ou cultural
O Partido Popular de Pontevedra levará ao Pleno municipal da próxima semana a necesidade de mellorar o paseo do río Gafos e, en particular, reforzar as tarefas de mantemento da contorna do leito fluvial ao seu paso polo barrio de Ou Gorgullón.
A concelleira popular Raquel Martínez manifestou que, á vista de que o goberno local do BNG non se preocupou por preservar este ámbito urbano, “desde o PP de Pontevedra queremos potenciar este recurso natural e paisaxístico como zona de paseo, descanso e #gozar para a cidadanía”.
Co obxectivo de dar maior visibilidade á riqueza ambiental e patrimonial dos recursos existentes, destacou que “toda a contorna do Gafos require dunha estratexia global para ofrecer aos pontevedreses unha zona de esparexemento segura, limpa e en óptimas condicións, máis se cabe para aproveitar os plans de destape do río ao seu paso polo barrio de Campolongo”.
Martínez denunciou a falta de elementos básicos do mobiliario urbano como bancos, papeleiras ou iluminación que poñen de manifesto a falta de atención por parte dos responsables municipais. Ademais, os poucos elementos que existen están deteriorados, o que dificulta o seu uso e xerará sobrecustos pola falta de mantemento dos mesmos.
Un dos exemplos máis rechamantes nas proximidades da rúa Ponche Boleira é o Muíño do Coto: “Este muíño, un dos oito que existen no tramo urbano do Gafos, está completamente abandonado, cheo de restos de lixo, con pintadas, a súa estrutura deteriorada e sen ningún tipo de sinalización ou protección. Ao continente hai que darlle contido e o Muíño do Coto non só ten un valor patrimonial e histórico, senón que tamén representa unha oportunidade para a divulgación cultural, a educación ambiental e a revitalización da zona”.
O PP de Pontevedra, no seu deber como o partido máis votado da cidade e #ante os intentos en balde por facer reaccionar ao goberno municipal nas comisións informativas do Concello, insistirá no Pleno do luns na necesidade de “acometer de maneira urxente a mellora integral da contorna do río Gafos coa instalación e reposición de bancos, papeleiras e outros elementos do mobiliario urbano”.
Así mesmo, reclamarase impulsar a rehabilitación e posta en valor do Muíño do Coto coa eliminación das pintadas, a retirada de residuos e o acondicionamento da contorna para garantir a súa protección e o seu posible uso didáctico ou cultural.
“As zonas verdes do centro urbano deben ser un lugar de lecer e esparexemento para as familias. Desde o PP non imos consentir que a contorna do Gafos, empezando polo tramo comprendido entre as estacións e Ponche Boleira, siga abandonado con papeleiras rotas, cravos soltos e o abandono de funcións habitual do BNG”, concluíu Martínez.
