• Pepa Pardo esixe ao Gobierno de España que levante de inmediato a suspensión acordada polo INVIED e permita aos usuarios continuar coa adquisición das vivendas: “Non se pode deixar nun limbo a familias que levan anos esperando e cumprindo coas súas obrigacións”
• Os populares reclaman que se respecte a antigüidade dos expedientes, garántase a igualdade de trato entre todos os afectados e o Ministerio de Defensa reúnase coa plataforma constituída en Pontevedra
O Grupo Municipal do Partido Popular de Pontevedra presentou unha moción para o seu debate no próximo Pleno municipal en defensa das máis de 80 familias da cidade afectadas pola suspensión do proceso de alleamento directo de vivendas militases acordada polo Consello Reitor do Instituto de Vivenda, Infraestrutura e Equipamento da Defensa (INVIED).
A concelleira popular Pepa Pardo explicou que esta decisión deixou a decenas de familias pontevedresas nunha situación de “incerteza e inseguridade xurídica”, despois de levar anos abonando o correspondente canon de uso e esperando poder exercer o seu dereito de adquisición sobre as vivendas que constitúen a súa residencia habitual.
“Estamos a falar de máis de 80 familias de Pontevedra que levan anos esperando, que cumpriron coas súas obrigacións e que, en moitos casos, realizaron importantes investimentos para manter unhas vivendas que son os seus fogares. Non é aceptable que agora se lles deixe nun limbo sen saber que vai pasar con elas”, sinalou Pardo.
O INVIED suspendeu o proceso de alleamento directo daquelas vivendas militares ocupadas en cuxos expedientes aínda non se remitira a correspondente oferta de compra, xustificando esta decisión na elaboración do Plan de Vivendas 2026-2030.
Para Pardo, esta decisión xera ademais “unha diferenza de trato dificilmente xustificable” entre usuarios que se atopan en situacións similares, dependendo unicamente de se a Administración chegara ou non a remitirlles a oferta antes de acordarse a suspensión.
“Non pode ser que dúas familias co mesmo dereito reciban un trato diferente simplemente porque a Administración tramitase un expediente antes que outro. Os atrasos administrativos non poden acabar prexudicando a quen leva anos esperando”, defendeu.
Por este motivo, o PP propón que o Pleno do Concello inste ao Gobierno de España a levantar de forma inmediata a suspensión e renovar a tramitación dos expedientes conforme a normativa vixente, remitindo as correspondentes ofertas de compra a todos os titulares que reúnan os requisitos legalmente establecidos.
A moción reclama tamén respectar a antigüidade das solicitudes, garantir a igualdade de trato entre todos os titulares e atender de xeito prioritario a situación de Pontevedra ante o atraso acumulado no alleamento destas vivendas.
Ademais, desde as filas populares esixen ao Gobierno central e ao Ministerio de Defensa que establezan unha interlocución directa cos afectados e que se reúnan coa plataforma constituída en Pontevedra para abordar a súa situación.
Pardo destacou, ademais, que a moción conta co visto e prace da plataforma de afectados de Pontevedra. A concelleira popular lembrou tamén que o PP xa rexistrou no Senado cinco baterías de preguntas relacionadas con esta situación para esixir explicacións e solucións ao Gobierno de España. “Non imos quedarnos aquí. Seguiremos dando todos os pasos que sexan necesarios para defender os dereitos destas familias”.
Desde o PP esperan que esta iniciativa conte co respaldo de todos os grupos políticos da Corporación municipal.
“Estas familias non están a pedir ningún privilexio. Están a reclamar que se respecte un dereito recoñecido e que unha decisión administrativa non bote por terra anos de espera. Desde o Concello temos que estar do seu lado e esixir ao Gobierno de España unha solución inmediata”, concluíu Pardo.
