O Obradoiro de Emprego Dual de Salvaterra de Miño vén de pechar un mes de outubro de intensa actividade e excelentes resultados formativos e operativos.
Este programa mixto de formación e emprego desenvólvese grazas a unha subvención concedida pola Consellería de Emprego, Comercio e Emigración da Xunta de Galicia, cun investimento que ascende a máis de 454.000 euros para a execución do proxecto denominado “SALVATERRAEMPREGA V”.
A través deste importante investimento público, o alumnado-traballador adquire competencias profesionais de primeiro nivel que melloran de forma directa a súa inserción laboral no mercado técnico actual, mentres realiza obras e servizos que reverten na utilidade pública e no coidado ambiental de Salvaterra.
Xestión forestal sostible e innovación micolóxica en Monte Castelo
Na especialidade de Forestal, o foco prioritario ao longo de outubro estivo situado no Monte Castelo. O equipo levou a cabo tarefas estruturais de roza, limpeza e recollida de residuos en espazos de uso veciñal como as inmediacións da capela da Ascensión. Así mesmo, realizáronse rozas no souto de castiñeiros, preparando o terreo de cara a facilitar un aproveitamento multifuncional —tanto de castañas como de cogomelos— por parte dos veciños.
No apartado de control de especies invasoras, traballouse na eliminación de exemplares e brotes de eucalipto e acacias mediante técnicas silvícolas como o escachado e o tratamento con inxección de glifosato en burato, ademais de retirar Tradescantia en zona ripícola. Como aposta pola innovación técnica, completouse o proceso de inoculación de micelio de Pleurotus e Reishi en trozas de eucalipto, procedendo ao selado con cera para o seu desenvolvemento. Todos os restos vexetais retirados foron triturados no punto.
Embelecemento paisaxístico e mantemento dos espazos urbanos
A rama de Xardinería executou intervencións visibles destinadas a potenciar a calidade estética e funcional dos espazos públicos municipais. Durante o mes de outubro destacou a reorganización integral e a plantación na rotonda de entrada á Muralla, así como as tarefas de perfilado na rotonda do Carro. O alumnado tamén renovou o axardinado e abonado con flores de Cyclamen en xardineiras de gran afluencia, como as da praza do Concello e a contorna da Casa da Cultura.
As actuacións urbanas incluíron ademais a poda de arbustos na praza de Abastos, o recorte e control de altura de setos na rúa Miño, o control de herbas adventicias e a limpeza estrutural do estípite das palmeiras de zonas verdes. A formación práctica en aula e campo viuse reforzada co uso de medidores de pH para analizar os parámetros, estrutura e textura do solo, e coa posta en práctica de métodos avanzados de propagación como o enxerto, o esgallado, o acodado e o manexo de bandexas de alveolos.
Visitas técnicas a proxectos de referencia
Para complementar o temario e abrir novas perspectivas laborais e de emprendemento, o alumnado realizou enriquecedoras viaxes de estudo coordinadas con comunidades de montes da comarca de Gondomar:
- Comunidade de Montes de Vincios: Analizouse o modelo de
aproveitamento produtivo e sostible do monte na serra do Galiñeiro, incluíndo
proxectos de cultivo micolóxico de Shiitake, proxectos de roza biolóxica mediante
pastoreo virtual con vaca cachena, e plantacións de frondosas autóctonas coma
carballos e castaños. - Comunidade de Montes de Couso: Coñeceuse de primeira man a
restauración ambiental de antigas canteiras e vertedeiros reconvertidos en
espazos comunitarios, as súas instalacións de produción de Shiitake feitas con
castaño, e a recuperación tradicional de resina.
Con este intenso mes de traballo, o proxecto “SALVATERRAEMPREGA V” non só
cumpre as expectativas formativas e de sustentabilidade fixadas pola Consellería
de Emprego, Comercio e Emigración, senón que consolida o compromiso de
Salvaterra de Miño cunha xestión eficaz que combina o emprego verde co
coidado do ben común
